Бугун эрталаб Самарқандда ЮНEСКО ишлари бўйича миллий комиссияларнинг XII минтақалараро учрашуви ўз ишини бошлади.
ЮНEСКО Бош директори ўринбосари Син Сюй (Хинг Қу) ва ЮНEСКО ишлари бўйича Ўзбекистон Миллий комиссияси раиси, Ўзбекистон Маданият ва санъатни ривожлантириш жамғармаси раиси, Президент Администрацияси Креатив иқтисодиёт ва туризм бўйича департаментининг раҳбари Гаяне Умерова табрик сўзларини йўлладилар. Учрашувга раислик қилиш учун сайланган Гаяне Умерова ўз нутқида Самарқанднинг тамаддунлар чорраҳаси сифатидаги рамзийлигини таъкидлаб, ЮНEСКО томонидан белгилаб берилган шериклик ва бирдамлик руҳини янгилаш муҳимлигини қайд этди.
Эрталабки дастур мавзуга оид икки сессиядан иборат бўлди. Биринчиси ёшларнинг ҳуқуқ ва имкониятларини кенгайтириш ҳамда барқарор ривожланиш учун уларнинг тинчлик, инсон ҳуқуқлари, ижтимоий инклюзия ва таълимни илгари суришдаги ролига бағишланди. Муҳокамада ЮНEСКО, шунингдек, Германия, Канада ва Кения миллий комиссиялари вакиллари иштирок этдилар.
Иккинчи муҳокама шўъбаси рақамли даврда маданиятлар ва жамоаларнинг ўзаро мулоқотига бағишланиб, унда маданий мерос, барқарор туризм ва Ипак йўли йўналишларига эътибор қаратилди. Сўзга чиққанлар орасида ЮНEСКО ҳамда Франция, Кюрасао ва Ўзбекистон миллий комиссиялари вакиллари бўлишди.
