Чиқинди хизматидан қарздор 199 мингга яқин абонентнинг электр тўловига вақтинча чеклов ўрнатилди. Бу ҳақда Чиқиндиларни бошқариш ва циркуляр иқтисодиётни ривожлантириш агентлиги хабар берди.
Маълум қилинишича, 5 февраль куни республика бўйича чиқинди хизматидан қарздорлиги қопланмаган умумий 108,9 миллиард сўм дебитор қарздорлик учун жами 1 174 686 та абонент “Ҳудудий электр тармоқлари” АЖнинг 2100 қисқа рақамидан SMS хабарнома орқали огоҳлантирилган. Шундан сўнг абонентларга мавжуд қарздорлигини бартараф этиш учун 5 кун муддат берилган ва бу даврда 12,7 миллиард сўмлик тўловлар амалга оширилган.
Республика кесимида қопланмай қолган умумий 15,8 миллиард сўм маиший чиқинди хизмати қарздорлиги учун жами 198 858 та абонентнинг электр энергияси учун тўловига чеклов ўрнатилди. Мазкур чеклов қарздорлик бартараф этилиши биланоқ дарҳол ечилади.
Чиқинди хизматларидан шаклланган қарздорликлар учун электр тўловига вақтинча чеклов дастлаб Тошкент шаҳрида 2025-йилнинг 5 ноябридан бошлаб қўлланди. 2025-йилнинг декабридан мазкур тартиб республиканинг қолган ҳудудларида ҳам жорий этилди.
Санитар тозалаш корхоналари чиқинди тўловларини ҳисоблашда аниқлик ва ҳаққонийлик учун жавобгар ҳисобланади.
