Бугун, 3 июнь куни Ҳиндистоннинг Нью-Деҳли шаҳри жанубидаги Малвия Нагар туманида жойлашган меҳмонхонада ёнғин юз берди. Оқибатда 21 киши ҳалок бўлди, яна 47 киши жароҳатланди. Бу ҳақда округ депутати Сатиш Упадхьяй ANI’га маълум қилди.
Қайд этилишича, фожиа тор кўчада жойлашган Flourish Stay B&B меҳмонхонасида содир бўлган. Меҳмонхона 25 та хонага эга бўлиб, 40 нафар меҳмонга мўлжалланган. Бинодагиларнинг аксарияти чет эл фуқаролари бўлган. Ҳодиса меҳмонлар ҳали ухлаётган вақтда юз берган.
Меҳмонхона ресторани бош ошпазининг сўзларига кўра, эрталаб соат 8 атрофида у электр плитасини ёқмоқчи бўлган ва шу пайт тўсатдан аланга чиқиб кетган. Кўп ўтмай бутун бино олов ичида қолган. Унинг айтишича, “ёнғин хавфсизлиги хизмати ва қутқарувчилар зудлик билан етиб келган”. Ёнғинни ўчиришга саккизта ўт ўчириш машинаси жалб этилган.
Бош вазир Нарендра Моди ҳалок бўлганларнинг оилаларига 200 минг рупия (2000 доллар), жароҳатланганларга эса 50 минг рупия (520 доллар) миқдорида товон пули тўланишини эълон қилган.
