YouTube платформаси маъмурияти 2026 йилда сунъий интеллект (СИ) ёрдамида яратилаётган, мазмунан саёз ва сифатсиз контент тўлқинига қарши кенг кўламли кураш бошлашини маълум қилди. Компания эндиликда нафақат спам ва кликбейт, балки тармоқда тобора кўпайиб бораётган такрорланувчи контент тарқалишини чекловчи технологияларни жорий этмоқда.
YouTube бош директори Нил Мохан платформанинг расмий блогида 2026 йил учун белгиланган стратегик мақсадларни эълон қилди. Унинг таъкидлашича, видеохостинг олдида турган энг катта тўсиқ бу СИ томонидан оммавий равишда ишлаб чиқарилаётган сифатсиз материаллардир. Саноат мутахассислари аллақачон бундай контентга нисбатан AI slop (сунъий интеллект чиқиндиси) атамасини қўлламоқда.
Мохан СИнинг жадал тараққиёти бир томондан қулайлик яратган бўлса, иккинчи томондан тармоқни спам, кликбейт ва ҳеч қандай интеллектуал қийматга эга бўлмаган, бир-бирини такрорловчи видеолар билан тўлдириб юборганини қайд этди. Бу муаммоларни бартараф этиш учун YouTube ўзининг автоматик модерация ва текширув алгоритмларини тубдан янгиламоқда.
“Сунъий интеллектнинг ривожланиши паст сифатли контент борасида жиддий хавотирлар уйғотди. Биз спам ва кликбейтга қарши курашишда самарали бўлган тизимларимизни такомиллаштириб, сифатсиз ва такрорланувчи контент кўламини максимал даражада камайтириш чораларини кўрмоқдамиз”, деди Нил Мохан.
Эндиликда платформа СИ ёрдамида яратилган ҳар қандай видеони махсус маркировка билан белгилашни бошлайди. Шунингдек, контент муаллифлари зиммасига нейро тармоқлардан фойдаланилгани ҳақида аввалдан огоҳлантириш мажбурияти юкланмоқда. Платформа қоидаларини бузувчи ёки томошабинни чалғитувчи ҳар қандай СИ контент тизимдан дарҳол ўчириб ташланади.
Капwинг компанияси томонидан ўтказилган сўнгги тадқиқотлар YouTube’даги вазият қанчалик жиддий эканини кўрсатмоқда. Маълум бўлишича, платформа янги фойдаланувчиларга тавсия этаётган видеоларнинг 20 фоиздан ортиғи айнан сунъий интеллектда яратилган. Ушбу видеолар фақатгина кўришлар сонини сунъий ошириш ва даромад олиш мақсадида яратилган.
Тадқиқотчилар дунё бўйлаб энг машҳур 15 мингта канални, жумладан, ҳар бир давлатнинг энг юқори 100 талик рейтингини таҳлил қилди. Натижалар ҳайратланарли: ушбу каналлардан 278 таси фақат сунъий интеллект ёрдамида яратилган контент билан тўлдирилган.
Ҳисоб-китобларга кўра, бундай “сунъий” каналлар жами 63 миллиарддан ортиқ кўришлар сони ва 221 миллион обуначини тўплашга улгурган. Уларнинг йиллик умумий даромади эса тахминан 117 миллион долларни ташкил қилмоқда. YouTube’нинг янги стратегияси айнан мана шундай сунъий равишда бойиётган ва платформанинг умумий сифатини тушираётган контент эгаларига қарши қаратилган.
