Давлатлар ва уларнинг ҳарбий салоҳиятини баҳолаб борадиган Global Firepower портал 2026 йил учун рейтингини эълон қилди. Унда Ўзбекистон 145 та давлат орасидан 0.9908 балл билан 53-ўринни эгаллади. Бу Марказий Осиёда энг юқори кўрсаткичдир.
Манбага кўра, Ўзбекистон қуролли кучларида 470 та танк, 8 692 та зирҳли транспорт воситаси, 159 та самолёт ҳамда 101 та вертолёт мавжуд. Қолаверса, мамлакат хизматга яроқли аҳоли сони бўйича дунёда 32, мудофаа бюджети бўйича эса 49-ўринни банд этган.
Марказий Осиё давлатлари орасида Қозоғистон (58), Туркманистон (78), Тожикистон (100) ва Қирғизистон (109) ўринларга муносиб топилган. АҚШ, Россия ва Хитой эса ҳар доимгидек дастлабки уч поғонани эгаллаган.
Биринчи ўнлик:
- АҚШ: 0.0741
- Россия: 0.0791
- Хитой: 0.0919
- Ҳиндистон: 0.1346
- Жанубий Корея: 0.1642
- Франция: 0.1798
- Япония: 0.1876
- Буюк Британия: 0.1881
- Туркия: 0.1975
- Италия 0.2211
Таъкидлаш жоиз, GFP индекси Қўшма Штатларда яшовчи блогер Даниэль Пучетти томонидан юритиладиган нодавлат лойиҳа ҳисобланади. Қолаверса, муаллиф рейтинг қандай манбалар асосида тузилишини, шунингдек, ҳисоб-китоблар қайси формула асосида олиб борилишини очиқламаган.
