Қўқон шаҳрида йўлдан ўтаётган 10 ёшли уч қизни Malibu-2 уриб юбориши оқибатида улардан бири вафот этди. Бу ҳақда Фарғона вилояти ИИБ матбуот хизмати хабар берди.
Воқеа 20 май куни соат 16:00 да содир бўлган. Вояга етмаган З.А. ўзининг бошқарувида бўлган Malibu-2 русумли автомашинани Қўқон шаҳар А.Темур кўчасида бошқариб кетаётиб, пиёдалар ўтиш жойидан ўтаётган 2016 йилда туғилган 3 нафар вояга етмаган қизларни уриб юборган.
Оқибатда қизлардан бири — 10 ёшли М.К. олган тан жароҳатлари туфайли касалхонада вафот этган.
Мазкур ҳолат юзасидан машинани бошқарган вояга етмаган З.А.га нисбатан Жиноят кодексининг 266-моддаси 2-қисми (транспорт воситалари ҳаракати ёки улардан фойдаланиш хавфсизлиги қоидаларини бузиш одам ўлимига сабаб бўлиши)билан жиноят иши қўзғатилиб, ЖПКнинг 221-моддаси тартибида ушланган. Ҳозирда дастлабки тергов ҳаракатлари олиб борилмоқда.
Фарғона вилояти ИИБ ота-оналарга мурожаат билан чиқиб, вояга етмаган, ҳайдовчилик гувоҳномасига эга бўлмаган фарзандларига автомашина бошқаришига йўл қўймасликка чақирди.
