АҚШ президенти Дональд Трамп Канада билан олиб борилаётган барча савдо музокаралари дарҳол тўхтатилганини эълон қилди. Бу ҳақда BBC хабар берди.
Трамп бунга сабаб сифатида Канаданинг АҚШ тарифларига қарши чиқарган реклама ролигини кўрсатмоқда. Реклама Онтарио провинсияси ҳукумати томонидан молиялаштирилган бўлиб, унда Қўшма Штатларнинг собиқ президенти Роналд Рейганнинг 1987 йилдаги нутқидан парча келтирилган. Нутқда Рейган “савдо тўсиқлари ҳар бир америкалик ишчига зарар келтиради”, деган эди.
Трамп ўзининг Truth Social платформасида Канада “сохта реклама”дан фойдаланганини айтиб, уни ёлғон деб атаган ва мамлакатни АҚШ суди қарорларига аралашишда айблаган.
Роналд Рейган жамғармаси Онтарио ҳукумати рекламада бу парчаларни ишлатиш учун рухсат олмаганини маълум қилган. Ташкилот реклама Рейганнинг фикрларини нотўғри талқин қилганини айтиб, ҳуқуқий чоралар кўришини билдирган. Трамп ўз баёнотида жамғарманинг танқидини ҳам келтириб ўтган.
АҚШ Канада маҳсулотларига — ёғоч, пўлат, алюминий ва автомобилларга — 25 фоизлик бож жорий қилганди. Сўнгра Трамп август ойида бу кўрсаткични 35 фоизгача оширган. Канада бош вазири Марк Карни эса Трампнинг тарифларни ошириш қароридан “ҳафсаласи пир бўлганини” айтган. Шу ой бошида икки раҳбар савдо масаласидаги зиддиятларни юмшатиш мақсадида учрашган.
Ҳозирда Канаданинг экспортининг 75 фоиздан ортиғи АҚШ ҳиссасига тўғри келади. Ҳар куни тахминан 3,6 миллиард Канада долларига тенг маҳсулот ва хизматлар икки мамлакат ўртасида алмашилади.
