Калифорния федерал суди Apple компанияси Masimo компаниясига 634 миллион доллар жарима тўлаши кераклигини белгилади. Бу ҳақда “Reuters” хабар берди.
Сўнгги олти йил давомида Masimo Apple компаниясининг Apple Watch ақлли соатларида кислород даражасини аниқлаш технологияларидан фойдаланишини биринчи компания ҳуқуқларини бузиш деб танқид қилиб келмоқда. Ўтган ҳафта АҚШ судида Masimo ҳақлиги тан олинди ва Apple компанияси билан бир нечта патент бўйича олиб борилган ишлар доирасида битта патент бўйича қарор чиқарилди.
Ушбу патент машқларни кузатиш ва юрак уриш тезлигини кўрсатиш режими билан боғлиқ. Apple суд қарорига рози эмаслигини билдирди ва унинг устидан бошқа инстанцияларда шикоят қилишга тайёрлигини маълум қилди.
Apple вакилларининг нашрга айтишича, Masimo компаниясининг 25 дан ортиқ патентларининг аксарияти олдинги олти йил давомида бекор қилинган ва мазкур патент 2022 йилда амал қилишини тўхтатган, шунингдек, бемор ҳолатини кузатиш технологияларига асосланган.
2023 йилда Apple Masimo билан бўлган низолар сабабли Watch Series 9 ва Ultra 2 соатларининг АҚШга импортини тўхтатишга мажбур бўлган. Apple баҳсли функцияларни ўчиргандан кейингина соатлар импорт қилиниши мумкин эди. 2024 йили Apple икки патенти бўйича қарши даъво бўйича ғалаба қозонди, аммо 250 долларлик компенсация рамзий бўлди.
АҚШ Халқаро савдо комиссияси Apple Watch янги версияларининг АҚШга импортини қонунийлигини текшириш бўйича иш очди, чунки Masimo компанияси Apple соатларининг блокланган функциялари низони ҳал қилишига ишонмаяпти. Текширув олти ой ичида якунланиши кутилмоқда.
