Эрон томонидан берилган зарбалар Яқин Шарқдаги камида 16 та АҚШ ҳарбий объектига жиддий зарар етказди. Бу ҳақда CNN хабар берди.
Гап саккизта давлат ҳудудида жойлашган базалар ва ҳарбий позициялар ҳақида бормоқда, уларнинг айримлари ҳозир деярли фойдаланишга яроқсиз ҳолга келган.
Телеканал маълумотига кўра, бу зарбалар тезкор, аниқ нишонга олинган ва замонавий технологиялар қўлланган ҳолда амалга оширилган.
Мисол сифатида Camp Arifjan (Қувайт) базаси келтирилган – у ерда алоқа сунъий йўлдош антенналарини ҳимоя қилган олти гумбаздан бештаси йўқ қилинган. Шунингдек, зарбалар Prince Sultan Air Base (Саудия Арабистони) ва Muwaffaq Salti Air Base (Иордания) авиабазаларидаги радар тизимларига ҳам таъсир кўрсатган.
АҚШ Конгрессидаги манбалардан бири радар тизимларига етказилган зарарни энг сезиларли йўқотиш деб баҳолаган, чунки бундай тизимлар минтақадаги энг қиммат ва чекланган ҳарбий ресурслардан ҳисобланади.
Аввалроқ, Эрон Ташқи ишлар вазири Аббос Ароқчи АҚШ Эрон билан можаро давомида ҳеч бир стратегик мақсадига эриша олмаганини айтган.
Можаро 28 февраль куни Эронда портлашлар билан бошланган. Исроил армияси Эрон ҳудудига олдиндан зарба берган. Кейинчалик АҚШ Президенти Дональд Трамп “Эпик ғазаб” номли кенг кўламли ҳарбий операция бошланганини эълон қилган.
Зарбалар оқибатида Эрон олий раҳбари Оятуллоҳ Али Хоманаий ҳалок бўлган. Мамлакатда 40 кунлик умумхалқ мотами эълон қилинган.
Кейинчалик Теҳрон АҚШ ҳарбий базаларига ракета ва дронлар билан жавоб зарбалари берган. Можаро БАА, Баҳрайн, Қатар, Қувайт, Саудия Арабистони ва Ироқ каби қўшни давлатларга ҳам таъсир кўрсатган.
8 апрель куни АҚШ зарбалари вақтинча тўхтатилган. Трампнинг айтишича, Вашингтон Теҳрондан можарони тартибга солиш бўйича таклифлар олган.
