Эрон Ислом республикасининг Экспертлар кенгаши Мужтабо Хоманаийни Эроннинг янги олий раҳбари лавозимга сайлади. Бу ҳақда “Iran International” хабар берди.
56 ёшли Мужтабо – АҚШ ва Исроил бомбардимонлари оқибатида ҳалок бўлган Оятуллоҳ Али Хоманаийнинг ўғли. Сўнгги ўн йил давомида у очиқчасига “ворис” сифатида тилга олиб келинар эди.
1980–1990 йилларда Мужтабо “кўринмас аскар” сифатида фаолият юритган. Кўплаб эронлик сиёсатчилардан фарқли равишда, у оммавий чиқишлардан четда бўлиб, фаолиятини сояда олиб борган. У Ислом инқилоби қўриқчилари корпуси ва махсус хизматлар тизимида тажриба орттирган. 2000 йиллар ўрталаридан бошлаб у “куч блоки”ни назорат қилгани, армия, денгиз ва ҳаво кучлари устидан отасига кўмак бергани айтилади.
Мужтабо “қаршилик меъмори” сифатида ҳам тилга олинади. У инқилобни прокси кучлар орқали экспорт қилиш стратегиясининг муаллифи сифатида кўрилади.
Кузатувчиларнинг фикрича, Эронда раҳбар алмашиши сиёсий йўналиш ўзгаришини англатмайди, балки услуб ўзгаришини билдиради. Мужтабо қатъий прагматик сифатида танилган. У “гибрид уруш” тарафдори ва Ғарб билан кескин қарама-қаршиликни ёқлайди. Унинг даврида ядро дастури бўйича музокаралар тўхтаб қолиши ёки янада қаттиқ шартлар билан давом этиши мумкин.
Шунингдек, янги раҳбар иқтисодда ўзини ўзи таъминлаш сиёсати ва ҳарбий-саноат мажмуасини ривожлантиришга устувор аҳамият бериши кутилмоқда. Бу эса санкциялар босими ички мобилизацияни янада кучайтириши эҳтимолини англатади.
