Тошкент шаҳри атрофида узунлиги 100 километр бўлган икки қаватли пулли ҳалқа автомобил йўлини қуриш режалаштирилмоқда. Лойиҳа қиймати 1 миллиард долларга баҳоланмоқда. Бу ҳақда Халқ депутатлари Тошкент шаҳар кенгашининг автомобил йўлларини қуриш, реконструкция қилиш, таъмирлаш ва сақлаш ишлари ҳолати тўғрисидаги қарорида маълум қилинди.
Қайд этилишича, лойиҳа China Railway Construction компанияси билан ҳамкорликда амалга оширилиши режалаштирилган.
Шунингдек, халқаро молия институтлари ва йирик хорижий компаниялар билан бир қатор йирик инфратузилма лойиҳалари бўйича келишувларга эришилган. Жумладан:
- China Construction томонидан 500 миллион долларлик лойиҳа доирасида 3 та йўл ўтказгич, 4 та кемпинг маскани барпо этиш ҳамда 27 километр йўлни капитал таъмирлаш;
- SINO-Hunan томонидан 1 миллиард долларлик лойиҳа доирасида 7 та туннел, 5 та йўл ўтказгич, 16 та кўчада 57 километр BRT йўлаклари ва 279 километр йўл қуриш;
- Shanghai Construction томонидан 100 миллион долларлик лойиҳа асосида 1 та кемпинг маркази барпо этиш ва 7,7 километр йўлни таъмирлаш;
- Xinjiang Hui’er Agricultural билан йўлбўйи ҳудудларини ландшафт дизайни асосида кўкаламзорлаштириш бўйича битимлар имзоланган.
Ҳужжатда қайд этилишича, пойтахтдаги тирбандлик юқори бўлган 260 километр кўча бўйича йўл ҳаракатини ташкил этиш лойиҳалари ишлаб чиқилган. Бунинг учун 260 километр йўлларнинг топохариталари, дрон тасвирлари ҳамда 271 та чорраҳадаги транспорт оқими таҳлил қилинган.
Ҳужжатда қайд этилишича, пойтахт йўл инфратузилмасини яхшилаш ишлари доирасида 3 946 та замонавий светофор ўрнатилган, 719,8 минг квадрат метр асфалт қопламаси таъмирланган, 61 та чорраҳада тирбандликни камайтиришга қаратилган қурилиш ишлари амалга оширилган.
Бундан ташқари, 2 889 та тунги ёритиш устуни таъмирланиб, 693 тасига декоратив безаклар ўрнатилди, ҳайдовчилар эътиборини чалғитувчи 902 та реклама конструкцияси олиб ташланди.
Амалга оширилган ишлар натижасида 220 та автобус бекатида кунига 267 минг йўловчи учун қулайлик яратилди, 64 та янги пиёдалар ўтиш жойида 167 минг нафарга яқин пиёданинг хавфсизлиги таъминланди.
Шунингдек, автобус бекатлари тартибга келтирилиши натижасида 6 та кўчада автобусларнинг ўртача ҳаракат тезлиги соатига 17 километрдан 20 километргача, инфратузилмаси янгиланган 12 та кўчада эса автомобилларнинг ўртача ҳаракат тезлиги соатига 23 километрдан 28 километргача ошгани қайд этилди.
