Навоий вилоятининг Нурота ва Навбаҳор туманлари чўл ҳудудларида 778 бош йўрға тувалоқ табиатга қўйиб юборилди.
Тадбир Экология ва иқлим ўзгариши миллий қўмитаси ҳузуридаги Экоҳудуд ва овчиликни ривожлантириш департаменти, вилоят Экология ва иқлим ўзгариши бош бошқармаси ҳамда Falcon Ҳунтинг Солутионс МЧЖ ҳамкорлигида ташкил этилди.
Маълум қилинишича, қушлар Бирлашган Араб Амирликларидаги ихтисослаштирилган питомникда парваришланган. Лойиҳа йўрға тувалоқ популяциясини тиклаш ва кўпайтириш, биохилма-хилликни асраш ҳамда чўл экотизимининг табиий мувозанатини сақлашга қаратилган.
Мутахассислар табиий муҳитга қўйиб юборилган қушларнинг мослашуви ва кўпайиши келгусида ушбу ноёб тур сонининг барқарор ортишига хизмат қилишини таъкидламоқда.
Қайд этилишича, бундай тадбирлар йўқолиб кетиш хавфи остидаги ҳайвон турларини муҳофаза қилиш, уларнинг табиий яшаш муҳитини тиклаш ва ёввойи табиатни асраш бўйича амалга оширилаётган ишларнинг муҳим қисми ҳисобланади.
