Божхона қўмитасининг тезкор тузилмалари томонидан Давлат хавфсизлик хизмати билан ҳамкорликда ўтказилган кўп босқичли тезкор тадбирлар давомида синтетик наркотик моддаларни республика ҳудудига ноқонуний равишда олиб кириш ва ички ҳудудда тарқатилишининг олди олинди.
Дастлабки босқичда жиноят занжири Россия Федерациясидан бошлангани маълум бўлди. 1994-йилда туғилган, такси ҳайдовчиси бўлган шахс 200 АҚШ доллари эвазига 2 дона “редуктор” автомобиль эҳтиёт қисмини номаълум шахслардан қабул қилиб, уларни “Навоий” чегара божхона постига етказиб келган. Ушбу эҳтиёт қисмларни постдан олиб ўтиш учун у 1989-йилда туғилган бошқа бир фуқарога 150 минг сўм тўлаган.
“Навоий” чегара божхона постида кузатув-рентген қурилмасида олинган тасвирлар шубҳа уйғотган. Текширув давомида эҳтиёт қисмлар белгиланган тартибда очиб кўрилганда, уларнинг ҳар бирининг ичига 3 тадан, жами 6 дона зарқоғозга ўралган ўрамлар яширилгани аниқланди. Марказий Божхона лабораториясининг хулосасига кўра, ўрамларда сал кам 5 килограмм оғирликдаги “кефедрон” синтетик гиёҳвандлик моддасининг бўлгани тасдиқланди.
Тадбирнинг навбатдаги босқичи Тошкент шаҳрининг Яшнобод туманида давом эттирилди. “Редуктор”ларни қабул қилиб, уларни якуний манзилларга етказиши керак бўлган курьер қўлга олинди. Курер Россиядан “Виталий” исмли шахс томонидан юборилган икки телефон рақами орқали Тошкент шаҳрида 25 ёшли икки фуқарога эҳтиёт қисмларни топшираётган вақтида ушланган. Ушбу шахслар синтетик модда қадоқларини беш манзил бўйича тарқатишни режалаштирган.
Дастлабки маълумотларга кўра, эҳтиёт қисмларни олиб келган ҳайдовчи, уларни божхона постидан ўтказган фуқаро ва уларни қабул қилиб олган курер эҳтиёт қисмлар ичига наркотик модда яширилганидан бехабар бўлган. Бироқ бу ҳолат уларнинг жавобгарликдан озод қилинишига асос бўла олмайди.
Божхона органлари фуқаролардан чегара божхона постлари орқали бегона шахсларнинг юкларини олиб ўтишдан қатъий тийилишларини сўради.
Маълумот учун, Президентнинг 2024 йил 3 ноябрдаги “Аҳоли саломатлиги ва миллат генофондини гиёҳвандлик ва наркожиноятлардан ҳимоя қилиш чора-тадбирлари тўғрисида”ги фармонига мувофиқ, гиёҳвандлик воситаларини уюшган гуруҳ томонидан трансчегаравий усулда ўтказиш учун йигирма йилгача озодликдан маҳрум қилиш жазоси белгиланиши кўзда тутилган.
Ҳозирда мазкур ҳолат юзасидан Божхона органлари томонидан Жиноят кодексининг 246- ва 273-моддалари билан жиноят иши қўзғатилган.
