Ўзбекистонда 2025-йилнинг январь-сентябрь ойларида расман қайд этилган йўл-транспорт ҳодисаларида 1303 киши вафот этди.
Сенатнинг 1 ноябрь куни бўлиб ўтган ўн биринчи ялпи мажлисида Сенатнинг Мудофаа ва хавфсизлик масалалари қўмитаси раиси Қутбиддин Бурхоновнинг маълум қилишича, ушбу давр давомида республикадаги умумий йўл-транспорт ҳодисалари ўтган йилнинг шу даврига нисбатан 3,8 фоизга — 6127 тадан 5895 тага (232 тага), тан жароҳати билан боғлиқ ҳолатлар 3,5 фоизга — 4759 тадан 4592 тага (167 тага), ўлим билан боғлиқ ҳолатлар 4,8 фоизга — 1368 тадан 1303 тага (65 тага), пиёдалар иштирокида содир этилган йўл-транспорт ҳодисалари сони эса 2855 тадан 2689 тага ёки 5,8 фоизга камайган.
Олий Мажлис Сенатининг учинчи ялпи мажлисида Ўзбекистонда 2024-йилда 9364 та йўл-транспорт ҳодисаси расман қайд этилгани маълум қилинганди. Бунинг оқибатида 2 203 киши ҳалок бўлган. Шунингдек, 8 901 нафар инсон тан жароҳати олган.
Ўзбекистонда 2023-йилда 9839 та, 2022-йилда 9902 та, 2021-йилда эса 10 001 та ЙТҲ содир бўлган.
