Навоий вилоятининг Томди, Конимех ва Хатирчи туманларида ўтказилган тезкор тадбир давомида фуқаролар томонидан олтинни ноқонуний қазиб олиш ва қумдан ажратиб олиш ҳолатлари аниқланди. Бу ҳақда Иқтисодий жиноятларга қарши курашиш департаменти хабар берди.
Ахборотда айтилишича, Томди туманида ўтказилган тезкор тадбирда фуқаро О.И. ва бошқалар “Бессопан” саноат майдони ҳудудидан таркибида умумий баҳоси 569,8 млн сўмлик 315,1 грамм олтин моддаси бўлган 5 200 кг маъданли тошларни ноқонуний равишда қазиб олган вақтида ушланиб, ушбу маҳсулотлар ашёвий далил сифатида олинган.
Шунингдек, Конимех туманида ҳам фуқаролар Т.Т. ва Т.Ғ. ўзаро тил бириктириб, “Караката” ОФЙ ҳудудида таркибида олтин моддаси бўлган қум ва тошларни олтин изловчилар усулида махсус ускуналар орқали қазиб олиш фаолияти билан шуғулланиб келётганликлари аниқланган.
Бу каби ҳолатлар Хатирчи туманида ҳам содир бўлган. Хусусан, фуқаро У.Р. “Зарафшон” МФЙ ҳудудидаги хонадонида қум ва тошдан олтин ажратиб олиш билан шуғулланиб келганлиги аниқланиб, ундан таркибида олтин зарралари бўлган 160 кг қум-тошлари ашёвий далил сифатида олинган. Яна бир фуқаро С.Х. ҳам “Зарафшон” МФЙ ҳудудидаги хонадонида қум ва тошдан олтин ажратиб олиш билан шуғулланиб келганлиги аниқланиб, ундан таркибида олтин зарралари бўлган 300 кг қум-тошлари ашёвий далил сифатида олинган.
Содир этилган мазкур ҳолатлар юзасидан Жиноят кодексининг 196-2-моддаси (фойдали қазилмаларни олтин изловчилар усулида рухсатномасиз қазиб олиш) билан жиноят ишлари қўзғатилиб, тергов ҳаракатлари ўтказилётгани айтилади манбада.
