Сурхондарё вилоятининг Денов туманида ўзининг таниши бўлган аёлнинг номаълум эркак билан жинсий алоқада бўлган видео тасвирларини тарқатмаслик учун 6 минг АҚШ доллари сўраб, шантаж қилмоқчи бўлган эркак ушланди. Бу ҳақда Сурхондарё вилояти Ички ишлар бошқармаси хабар берди.
Маълум бўлишича, жорий йилнинг 10 февраль куни Денов туманида яшовчи фуқаро туман Ички ишлар бўлими бошлиғи номига ариза билан мурожаат қилган. Унинг айтишича, бир эркак шахс ўзининг таниши бўлган аёлнинг номаълум эркак билан жинсий алоқада бўлган видео тасвирларини телефон қурилмасида сақлаб келаётганини айтиб, ушбу видеоларни ижтимоий тармоқлари орқали яқин қариндошлари ва танишларига тарқатиш, обрўсизлантириш билан қўрқитган ва 6 минг АҚШ доллари талаб қилган. Олдиндан эса 3 минг АҚШ долларини беришини сўраган.
Мазкур мурожаат асосида тезкор тадбир ўтказилган. Тадбир давомида ариза муаллифига холислар иштирокида талаб қилинган 3 минг АҚШ доллари ўрнига 1 минг АҚШ доллари ва 18 млн сўм миқдоридаги пул воситаларига кимёвий ишлов берилган. Пул маблағларини олиш учун келган шахс тезкор тадбир иштирокчилари томонидан ашёвий далиллар билан қўлга олинган.
Мазкур ҳолат юзасидан ушбу шахсга нисбатан Жиноят кодексининг 165-моддаси (фирибгарлик) 2-қисми “а” банди билан жиноят иши қўзғатилиб, айни пайтда дастлабки тергов ҳаракатлари бошланган.
