Жиззах вилоятида электр тармоғига ноқонуний уланганини расмийлаштирмасликни ваъда қилган муҳандис 10 млн сўм билан қўлга тушди. Бу ҳақда Бош прокуратура ҳузуридаги Иқтисодий жиноятларга қарши курашиш департаменти хабар берди.
Маълум бўлишича, ўтказилган тезкор тадбирда “Энергосавдо” филиали Жиззах шаҳар бўлими ходими Э.М. “С.М.” оилавий корхонасининг ишлаб чиқариш цехида электр тармоғига ноқонуний уланганлиги ҳолати бўйича далолатнома расмийлаштирмаслик эвазига корхона раҳбаридан 10 млн сўмни олган пайтда ашёвий далиллар билан ушланган.
Мазкур ҳолат юзасидан Жиноят кодексининг 168-моддаси (фирибгарлик) билан жиноят иши қўзғатилиб, тергов ҳаракатлари бошланган.
Шунингдек, энергия ресурсларидан ноқонуний фойдаланиш ҳолатлари билан боғлиқ 3 та қонунбузарлик фош этилган.
Департаментнинг Қўшработ тумани бўлими томонидан ўтказилган терговга қадар текширувда “Б.О.” фермер хўжалиги раҳбари С.Б. сув насосларини электр тармоғига тижорат мақсадида ўзбошимчалик билан улаб, 219,6 млн сўмлик электр энергиясидан ноқонуний фойдалангани аниқланган.
Департаментнинг Жомбой тумани бўлими томонидан ўтказилган терговга қадар текширувда “А.Н.” оилавий корхонаси раҳбари Т.И. корхона ошхонасида табиий газ тармоғига ўзбошимчалик билан тўғридан тўғри уланиб, 165,7 млн сўмлик табиий газдан ноқонуний фойдалангани фош этилган.
Яна бир ҳолатда Бувайда туманида “Х.О.” фермер хўжалиги раҳбари Х.А. “Меҳнатобод” маҳалла фуқаролар йиғини ҳудудидаги балиқ ҳавзасида умумий фойдаланишдаги электр тармоғига тижорат мақсадида ўзбошимчалик билан уланиб, 117,7 млн сўмлик электр энергиясидан ноқонуний фойдаланиб келгани аниқланган.
Мазкур ҳолатлар юзасидан Жиноят кодексининг 169-моддаси (ўғрилик) билан жиноят ишлари қўзғатилиб, тергов ҳаракатлари бошланган.
