Япония маҳаллий суди АҚШ Ҳарбий-ҳаво кучларининг Кадена авиабазасидан учаётган самолётлар шовқини шаҳарликларга зарар етказаётгани ҳақида тўхтамга келди. Шу боис маҳкама ҳукумат маҳалий аҳолига компенсация тўлаши ҳақида ҳукм чиқарди. Умумий тўлов миқдори 16,3 миллион долларни ташкил этади. Бу ҳақда Stars and Stripes нашри хабар берди.
Суд ҳужжатларига кўра, АҚШ ҳарбий самолётлари чиқарган баланд шовқин маҳаллий аҳолининг кундалик ҳаётига салбий таъсир кўрсатмоқда. Хусусан, одамлар доимий безовталик, асабийлик ва уйқусизликдан азият чекаётганидан шикоят қилишган. Шунингдек, айримлар самолётлар билан боғлиқ ҳалокат юз бериши мумкинлигидан хавотир билдиришган.
Маълум қилинишича, 2019 йил бошидан 2025 йил ўрталаригача бўлган даврда етказилган зарар учун компенсация тўланади. Ҳар бир фуқарога бериладиган пул миқдори унинг базага қанчалик яқин яшаши ва у ерда қанча вақт истиқомат қилганига қараб белгиланади.
Бироқ суд маҳаллий аҳолининг яна бир талабини қаноатлантирмаган. Аризада АҚШ Ҳарбий-ҳаво кучларининг базадаги фаолиятини чеклаш ҳам сўралганди. Сабаб сифатида Япония ҳукуматининг бундай масалаларда ваколатга эга эмаслиги, Кадена базаси ўз фаолиятини халқаро шартномалар асосида олиб бориши келтирилган.
Суд вакилларининг айтишича, ҳозирча компенсация оладиганларнинг аниқ сони номаълум. Чунки 5 мингдан ортиқ даъвогар орасида аризасини қайтариб олганлар ёки маҳкама якунига етмасдан вафот этганлар бўлиши мумкин.
Кадена Қўшма Штатларнинг Япониядаги энг йирик базаси ҳисобланади. У Окинава префектурасида жойлашган бўлиб, маҳаллий аҳоли 1980 йиллардан бери самолётлар шовқинидан норозилик билдириб келади. Японияликлар бу билан чекланмай, база фаолияти устидан судга кўп маротаба шикоят қилишган. Энг йирик иш 2017 йилда кўриб чиқилган бўлиб, ўшанда ҳукумат 22 мингдан ортиқ фуқароларига қарийб 265 миллион доллар тўлашга мажбур бўлганди.
