Мактаб директорлари ва уларнинг ўринбосарларига эндиликда фаолият самарадорлиги кўрсаткичлари (KPI) асосида ойлик устамалар тўланади.
Қайд этилишича, умумтаълим муассасаларининг директори ва унинг ўринбосарлари фаолиятининг самарадорлиги мактабнинг тегишли кўрсаткичларига мувофиқ 100 баллик тизимда баҳоланади. Уларга базавий тариф ставкаларига нисбатан 20 фоиз ҳар ойлик устамалар тўланади.
Бунда академик, ноакадемик, тарбиявий ишлар ва молиявий фаолият самарадорлиги ҳамда малакали ўқитувчилар билан таъминланганлик даражаси натижаларига қаралади. Кўрсаткичлар баҳолаш методикаси ва тартиби Мактабгача ва мактаб таълими вазирлиги томонидан тасдиқланади.
Бундан ташқари, ўз фаолиятида ижобий натижа кўрсатган жисмоний тарбия фани ўқитувчилари базавий тариф ставкаларига нисбатан 20 фоизгача рағбатлантирилади, шунингдек, умумтаълим муассасаларида ташкил этилган “Заковат” интеллектуал клубларининг координатори бўлган ўқитувчиларга уларнинг тариф ставкасининг 50 фоизи миқдорида бир марталик тўлов тўланади.
