Қўшма Штатлар ва Нигерия ИШИДнинг энг фаол террорчиси деб аталган Абу-Билол аль-Минукини йўқ қилиш бўйича қўшма операция ўтказди. Бу ҳақда АҚШ Президенти Дональд Трамп ўзининг Truth Social ижтимоий тармоғидаги саҳифасида маълум қилди.
“Бугун тунда менинг кўрсатмамга биноан довюрак Америка кучлари ва Нигерия Қуролли кучлари дунёдаги энг фаол террорчини жанг майдонидан йўқ қилиш бўйича пухта режалаштирилган ва ўта мураккаб миссияни бенуқсон бажардилар.
ИШИДнинг глобал иерархиясида иккинчи шахс бўлган Абу-Билол аль-Минуки Африкада яшириниб оламан деб ўйлаганди, бироқ у бизнинг ихтиёримизда унинг ҳар бир қадамидан хабардор қилиб турган манбалар борлигини хаёлига ҳам келтирмаганди. У энди Африка халқини террорга сола олмайди ёки америкаликларга қарши қаратилган операцияларни режалаштиришда ёрдам бера олмайди. Унинг йўқ қилиниши билан ИШИДнинг глобал фаолияти сезиларли даражада заифлашди. Ушбу операциядаги ҳамкорлик учун Нигерия ҳукуматига миннатдорлик билдираман”, дейди Трамп.
“Euronews” маълумотларига кўра, аль-Минуки 2018 йилда гуруҳнинг Ғарбий Африкадаги аввалги раҳбари Мамман Нур ҳалок бўлганидан кейин минтақавий қўмондонлардан бирига айланган. У “ашаддий радикал жангари” сифатида тавсифланган, 2023 йилдан бошлаб эса АҚШ уни расман террорчилар рўйхатига киритган эди.
