АҚШ давлат департаменти делегацияси 10 апрель куни Гаванага ташриф буюрди. Бу Барак Обаманинг 2016 йилдаги тарихий сафаридан бери илк америкалик расмийларнинг ташрифи ҳисобланади. Бу ҳақда Axios нашри хабар берди.
Расмий эълон қилинмаган ушбу сафар давомида америкалик амалдорлар Куба раҳбариятининг юқори лавозимли вакиллари билан бир қатор учрашувлар ўтказган. Музокараларда, жумладан, Рауль Родригес Кастро ҳам иштирок этган.
Axios маълумотига кўра, музокараларнинг асосий мавзуси АҚШ талаб қилаётган кенг кўламли сиёсий ва иқтисодий ислоҳотлар бўлган. Бунинг эвазига Вашингтон Кубага иқтисодий ёрдам кўрсатишга, жумладан, кўп йиллик савдо эмбаргосини юмшатиш ҳамда Starlink орқали алоқа хизматидан фойдаланиш имконини беришга тайёр.
Шу билан бирга, америкалик амалдорлар Куба ҳукуматини огоҳлантириб, ислоҳотлар учун “фақат қисқа имконият ойнаси” мавжудлигини, акс ҳолда “вазият қайтариб бўлмас даражада ёмонлашиши” мумкинлигини билдирган.
The Wall Street Journal’нинг ёзишича, Рауль Родригес Кастро АҚШ президенти Дональд Трампга расмий дипломатик каналлардан четлаб ўтиб мактуб етказишга уринган. Унда у санкцияларни юмшатиш эвазига иқтисодий ва инвестицион келишувлар таклиф қилган.
Нашр, шунингдек, АҚШ расмийлари кубалик вакиллар билан музокараларни айнан унинг воситачилигида олиб борганини қайд этади.
