Эрон АҚШга Ҳормуз бўғозини қайта очиш ва урушни тугатиш бўйича янги таклифлар берди. Бу ҳақда манбаларга таяниб Axios хабар берди.
Маълумотларга кўра, Эрон ядровий дастур муҳокамасини кейинги босқичга қолдириб, аввало урушни тўхтатиш ва денгиз блокадасини бекор қилиш ташаббуси билан чиққан. Таклиф Покистон воситачилари орқали АҚШга етказилган.
Эрон ушбу режа орқали ядровий ён беришлар масаласидаги келишмовчиликларни четлаб ўтиб, келишувга тезроқ эришишни кўзламоқда. Бироқ денгиз блокадаси АҚШ президенти Дональд Трампнинг Эронни уранни бойитишдан воз кечишга мажбурловчи асосий воситаси ҳисобланади.
АҚШ президенти 27 апрель куни миллий хавфсизлик жамоаси билан ушбу масалани муҳокама қилиши кутилмоқда. Аввалроқ у Эрон нефть экспортига қўйилган денгиз блокадасини давом эттириш ниятида эканини билдирган. Трамп иқтисодий босим бир неча ҳафта ичида Теҳронни ён беришга мажбур қилишини айтганди.
Дипломатик инқироз ўтган дам олиш кунлари Эрон ташқи ишлар вазири Аббос Ароқчининг Покистонга ташрифи натижасиз якунлангач, янада чуқурлашди. Трамп ўзининг музокарачилари Стив Уиткофф ва Жаред Кушнернинг Исломободга сафарини бекор қилди. У 18 соат парвоз қилиб, натижаси муваффақиятсиз тугаши мумкин бўлган музокаралардан маъно йўқлигини айтган. Эрон ТИВ раҳбари эса Покистондаги учрашувда мамлакатнинг “қизил чизиқлари”га аниқлик киритиб, ўзаро келишув имкониятларини муҳокама қилган.
Ароқчи 27 апрель куни Россия президенти Владимир Путин билан Москвада музокара ўтказиши кутилмоқда. АҚШ томони эса Эроннинг камида ўн йил давомида уранни бойитишни тўхтатишини ва мавжуд захираларни мамлакатдан чиқариб юборишини талаб қилмоқда.
Оқ уй матбуот хизмати вакили Оливия Уэлс дипломатик муҳокамалар давом этаётганини тасдиқлади. Бироқ у АҚШ фақат ўз манфаатларига мос келадиган ва Эроннинг ядровий қуролга эга бўлишига йўл қўймайдиган келишувга рози бўлишини таъкидлади.
