Бугун, 12 март куни Эроннинг янги Олий раҳнамоси Мужтабо Хоманаий илк бор халққа мурожаат қилди. Унинг мурожаати “Tasnim” ахборот агентлиги томонидан тарқатилди ва Эрон телевидениесида ўқиб эшиттирилди, бироқ унинг ўзи кадрда кўриниш бермаган.
Хоманаий ўзининг тайинлангани ҳақида бошқа эронликлар билан бир вақтда – Экспертлар кенгашидаги овоз бериш жараёнининг телетрансляцияси орқали билганини айтган. Унинг сўзларига кўра, Олий раҳнамо курсисини эгаллаш у учун қийин, чунки бу ўрин аввал икки “буюк имом” – Хумайний ва ўзининг отаси “шаҳид Хоманаий”га тегишли бўлган.
Мурожаатнинг марказий мавзуси уруш бўлган. Хоманаий ҳарбийларга душманга берилган “қақшатқич зарбалар” учун миннатдорлик билдирган ва Эрон Ҳурмуз бўғозини тўсишда давом этишини маълум қилган. Унинг сўзларига кўра, душманнинг “тажрибаси деярли йўқ” ва “ҳаддан ташқари заиф“ бўлган “янги фронтлар” устида иш олиб борилмоқда – зарурат туғилганда улар ишга солинади. Янги раҳнамо, шунингдек, Яман ҳусийлари, “Ҳизбуллоҳ” ва Ироқ қаршилик кучларига қўллаб-қувватлаганликлари учун ташаккур айтган.
Хоманаий ҳалок бўлган ҳар бир эронлик учун – нафақат отаси, балки ўлдирилган ҳар қандай фуқаро учун қасос олишга ваъда берган. У Минобдаги қизлар мактабига берилган зарбани алоҳида эътибор талаб қиладиган жиноят сифатида ажратиб кўрсатган. Шунингдек, янги раҳнамо огоҳлантирган: Эрон душмандан репарация (товон) талаб қилади, рад этилган тақдирда эса ё унинг мулкини мусодара қилади, ёки шунга тенг миқдордаги қийматни йўқ қилади.
Ҳудудида хорижий ҳарбий базалар жойлашган қўшни давлатларга Хоманаий тўғридан тўғри огоҳлантириш юборган: Эрон айнан ўша объектларга зарбалар берган ва беришда давом этади – бунда давлатларнинг ўзлари билан урушиш нияти йўқ. У ушбу мамлакатларни базаларни “иложи борича тезроқ” ёпишга чақирган, чунки унинг айтишича, Американинг хавфсизлик ҳақидаги ваъдалари ёлғон бўлиб чиққан.
Нутқнинг ички сиёсий қисмида Хоманаий халқнинг ролига урғу берган: унинг фикрича, айнан эронликлар мамлакат Олий раҳнамосиз қолган кунларда давлатни бошқарган. У бирдамликка, ўзаро ёрдамга ва жамият ҳаётида фаол иштирок этишга чақирган.
Маъдумот учун, Мужтабо Хоманаий Эроннинг учинчи Олий раҳнамоси бўлди. Экспертлар кенгаши уни 8 март куни – 28 февралда АҚШ ва Исроилнинг қўшма авиазарбаси оқибатида ҳалок бўлган отаси, Оятуллоҳ Али Хоманаий вафотидан бир неча кун ўтиб сайлади. АҚШ Президенти Дональд Трамп бундан сал аввал “Axios” нашрига берган интервьюсида Мужтабони “енгил вазнли” (тажрибасиз) деб атаган ва ўлдирилган оятуллоҳ сиёсатини давом эттирадиган номзодни қабул қилмаслиги билан таҳдид қилган.
