АҚШ президенти Дональд Трамп саёҳатга тўлиқ ёки қисман чекловлар қўлланадиган давлатлар рўйхатини 39 тага кенгайтирувчи фармонни имзолади. Бу ҳақда Оқ уй маълумотига таяниб CNN хабар берди.
Дастлаб ушбу рўйхатда 19 та давлат бор эди. Фармонга кўра, тўлиқ саёҳат тақиқи қўлланадиган давлатлар сони 7 тага ошди. Уларга Лаос, Серра Леоне, Буркина Фасо, Мали, Нигер, Жанубий Судан ва Сурия киради. Лаос ва Серра Леоне аввал қисман чекловлар остида бўлган.
Шунингдек, қисман чекловлар жорий этиладиган яна 15 та давлат рўйхатга киритилди. Ангола, Антигуа ва Барбуда, Бенин, Кот-д’Ивуар, Доминика, Габон, Гамбия, Малави, Мавритания, Нигерия, Сенегал, Танзания, Тонга, Замбия ва Зимбабве шулар жумласидандир.
Декабрь ойи бошида АҚШ ички хавфсизлик вазири Кристи Ноэм Трамп маъмуриятига рўйхатни 30–32 та давлатгача кенгайтиришни тавсия қилган эди. Рўйхатга киритилган давлатлар фуқаролари АҚШга саёҳат қилишда чекловларга дуч келади. Оқ уйга кўра, ушбу мамлакатлар “текширув, саралаш ва ахборот алмашиш тизимларида жиддий камчиликларга эга”.
Фармон, шунингдек, Фаластин маъмурияти томонидан берилган саёҳат ҳужжатларига эга шахсларга нисбатан ҳам чекловлар жорий этади. Шу билан бирга, Туркманистон фуқаролари учун ноиммигрант визаларга қўйилган тақиқ бекор қилинади, бироқ туркман фуқароларининг мамлакатга кириши бўйича чекловлар сақланиб қолади.
- Доимий яшаш ҳуқуқига эга шахслар, амалда бўлган визаси борлар, айрим виза тоифалари ҳамда кириши АҚШ миллий манфаатларига хизмат қиладиган шахслар учун истиснолар назарда тутилган.
Аввалроқ 12 та давлат — Афғонистон, Мьянма, Чад, Конго, Экваториал Гвинея, Эритрея, Гаити, Эрон, Ливия, Сомали, Судан ва Яман фуқароларининг АҚШга кириши тақиқланганди. Шунингдек, Бурунди, Куба, Лаос, Серра Леоне, Того, Туркманистон ва Венесуэладан киришлар қисман чекланган эди.
Давлатлар рўйхатининг кенгайтирилиши Трамп маъмурияти иммиграцияга қарши чораларни кучайтираётган бир пайтда эълон қилинди. Бу чоралар Вашингтонда юз берган отишма оқибатида Миллий гвардиянинг бир аъзоси ҳалок бўлиб, яна бири оғир яралангани билан изоҳланмоқда. Мазкур ҳужум афғонистонлик мигрант томонидан содир этилган эди.
