Мексикада “Картел де лос Рейес” жиноий гуруҳининг раҳбари Алфонсо Фернандес Магалён ушланди. Жиноий оламда “Пончо Ла Кирингуа” номи билан танилган ушбу шахс учун АҚШ 5 миллион доллар мукофот эълон қилганди. Операция ҳақида Мексика хавфсизлик вазири Омар Гарсия Арфуч маълум қилди.
Ҳибсга олиш тадбири 1 август куни Мичоакан штатининг Имбаракуаро қишлоғида ўтди. Бу Магалённинг ўз жиноий фаолиятини олиб борган ҳудуд ҳисобланган. Операцияда армия ва Миллий гвардия бошчилигидаги федерал кучлар, денгиз флоти, Бош прокуратура ҳамда штат полицияси қатнашган.
“Қўлга олинган шахсга нисбатан ноқонуний равишда озодликдан маҳрум қилиш ва исён кўтариш айбловлари бўйича ҳибсга олиш ордери мавжуд. АҚШ ҳукумати уни ҳибсга олишга олиб келадиган маълумот учун беш миллион долларгача мукофот таклиф қилган”, деди Гарсия Арфуч ижтимоий тармоқларда.
Фернандес Магалён автомобил ўғирлаш, товламачилик ва наркотик савдосида ҳам айбланмоқда. Унга нисбатан АҚШ Миллий хавфсизлик бошқармаси ҳам тергов олиб бормоқда. У билан бирга яна икки киши — Мартин Сильва Осорно ва Федерико Пласенсия Мендосу ҳам қўлга олинган. Улардан гиёҳванд моддалар, қурол ва ўқ-дорилар мусодара қилинган.
Ушланганлар Мексика Ҳаво кучлари вертолётида пойтахтга олиб кетилган ва Бош прокуратурага топширилган. Фернандес Магалён “Эл Абуэло” (Бобо) лақабли Хуан Хосе Фариас Алвареснинг ишончли одами саналади. Тепалкатепек картелига раҳбарлик қилувчи ушбу шахс учун ҳам АҚШ 10 млн доллар ваъда қилган.
“У автомобил ўғирлаш, ноқонуний озодликдан маҳрум этиш, товламачилик ва гиёҳванд моддалар савдоси каби жиноятларга алоқадор. У Тепалкатепек картели раҳбари Хуан Хосе Н. (яъни Эл Абуэло)нинг яқин ҳамкоридир”, дейилади Мексика армияси баёнотида.
Наркобароннинг ушланиши гуруҳ аъзоларининг кескин қаршилигига сабаб бўлди. Улар ҳибсга олинганларни олиб кетишга халақит бериш учун йўлларни автомобиллар билан тўсиб, машиналарга ўт қўйди. АҚШнинг Мексикадаги элчиси Роналд Жонсон ҳолатга “жиноятчиларнинг яширинадиган жойи йўқ”, дея муносабат билдирди.
