Грецияда йирик ўрмон ёнғинини ўчириш ишлари вақтида икки ёнғин ўчирувчи вертолёт ҳавода тўқнашиб кетди. Ҳодиса оқибатида 2 киши ҳалок бўлди. Бу ҳақда мамлакат ёнғин хизмати хабар қилди.
Маълумотга кўра, ҳалок бўлганлардан бири Греция, иккинчиси Дания фуқароси бўлган. Иккинчи вертолёт экипажидаги Греция ва Буюк Британия фуқаролари эса омон қолган. Ҳозирда тўқнашув сабаблари юзасидан тергов олиб борилмоқда.
Ҳодиса Афинадан шимоли-ғарбийда жойлашган Аттика минтақасидаги Псата ҳудудида содир бўлган. Бу ердаги йирик ўрмон ёнғини 100 дан ортиқ уйни вайрон қилган. Ёнғин туфайли Кефалония сайёҳлик оролидаги бир нечта аҳоли пунктлари ҳам эвакуация қилинган.
Маҳаллий ОАВ маълумотига кўра, Беотия вилоятида бошланиб Аттикага тарқалган ёнғинга шамол электр станцияларидан миллий электр тармоғига электр узатувчи хусусий тармоқ симларидан чиққан учқунлар сабаб бўлган бўлиши мумкин. Эҳтиётсизлик гумони билан икки нафар Греция фуқароси қўлга олинган, яна бир гумондор қидирилмоқда.
Греция Бош вазири Кириакос Мицотакис айрим ҳолатларда табиат кучи ва об-ҳаво шароитлари инсон имкониятларидан устун келишини таъкидлаган.
Шу билан бирга, Франциянинг Вар ҳудудида шамол йўналиши ўзгариши туфайли йирик ўрмон ёнғини қийин етиб бориладиган ўрмонларга тарқалган. Каркассон шаҳри яқинида эса ёнган автомобил сабаб янги ёнғин келиб чиққан. Автомагистрал ёпилган ва яқиндаги ҳайвонот боғи эвакуация қилинган.
Испаниянинг марказий қисмида ўтган ҳафта ўн минглаб гектар майдонни қамраб олган ёнғинлар асосан назоратга олинган бўлса-да, айрим ҳудудларда аланга қайта кучайган. Европанинг бир қатор давлатлари қурғоқчилик ва сув сатҳининг пасайиши оқибатларига ҳам дуч келмоқда. Венгрияда Дунай дарёси суви рекорд даражада пасайгани сабаб мамлакатдаги ягона атом электр станцияси 40 йилдан ортиқ вақт ичида илк бор ишини тўхтатган. Сербияда ҳам Дунайдаги сув сатҳи 1985 йилдан буён энг паст кўрсаткичга тушиб, мамлакатнинг энг йирик гидроэлектр станцияси ишлаб чиқариш қуввати кескин камайган.
