Тошкент шаҳрида Li ва BYD автомобильлари иштирокида юз берган ЙТҲ бўйича декабрь ойида чиқарилган суд қарори орадан бир ой ўтиб бекор қилинди.
Қайд этилишича, Мустақиллик кўчасида содир бўлган йўл-транспорт ҳодисаси юзасидан жиноят ишлари бўйича Мирзо Улуғбек туман судининг маъмурий ҳуқуқбузарликка доир қарори апелляция инстансияси судлов ҳайъатида мазмунан кўриб чиқилган.
Апелляция инстансиясида тарафларнинг важлари муҳокама қилиниб, маъмурий ҳуқуқбузарликка доир иш бўйича дастлабки суриштирув ишлари тўлиқ ўтказилмагани ҳамда уларни суд жараёнида бартараф этиш имконияти йўқлиги аниқланган. Шу боис биринчи инстансия суди қарори бекор қилиниб, иш материаллари қўшимча суриштирув ҳаракатлари ўтказиш учун тегишли органга юборилди.
Шунингдек, аввал чиқарилган суд қарорига кўра, Lixiang L9 русумли автомобильга 798 243 600 сўм миқдорида моддий зарар етказилгани аниқланиб, зарарни баҳолаш харажатлари билан бирга ундириш масаласи кўриб чиқилган. Шу тариқа BYD ҳайдовчиси қарийб 800 млн сўм миқдоридаги зарар суммаси билан боғлиқ мажбуриятларга тортилгани маълум қилинган.
