Бугун, 9 февраль куни Жанубий Кореянинг Кёнгидо провинциясига қарашли Капхён туманида армияга тегишли AH-1C русумли ҳарбий вертолёт қулаб тушди. Бу ҳақда “Yonhap” хабар берди.
Агентлик маълумотларига кўра, ҳалокат тахминан соат 11:00 да (Тошкент вақти билан 5:00) Сеул шаҳридан 55 километр шимоли-шарқда содир бўлган. Ҳарбий вертолёт бортида икки киши бўлган. Улар оғир тан жароҳатлари олган ва юрак уриши тўхтаган ҳолатда шифохонага етказилган.
2025 йил март ойида ҳам Жанубий Кореяда ўрмон ёнғинларини ўчириш ишларига жалб этилган вертолёт ҳалокатга учраган эди. Ўша ҳодиса оқибатида учувчи ҳалок бўлган.
Маълумот учун, AH-1C – АҚШда ишлаб чиқарилган ҳужумчи ҳарбий вертолёт бўлиб, у машҳур Bell AH-1 Cobra оиласига мансуб. Ушбу вертолёт асосан қуруқликдаги қўшинларни ҳаводан қўллаб-қувватлаш, зирҳли техникани йўқ қилиш ва жанг майдонида разведка вазифаларини бажариш учун мўлжалланган. AH-1C бир двигателли бўлиб, тор ва чўзилган фюзеляжи уни нишонга кичикроқ кўринишга эга қилади, бу эса жанговар шароитда омон қолиш имкониятини оширади. У 20 ммли автомат тўп билан қуролланган, шунингдек, бошқариладиган ва бошқарилмайдиган ракеталар, жумладан TOV танкка қарши ракеталарини олиб юриши мумкин. Вертолёт максимал тахминан 280 км/соат тезликка эга, учиш масофаси 500 км атрофида, экипажи икки кишидан – учувчи ва қурол операторидан иборат.
