Фарғонада давлат-хусусий шериклик асосида 800 ўринли кўп тармоқли замонавий шифохона қурилади. Бу ҳақда Соғлиқни сақлаш вазирлиги хабар берди.
Маълум қилинишича, ССВ Иқтисодиёт ва молия вазирлиги кўмагида Фарғона вилоятида кўп тармоқли шифохона ташкил этиш бўйича ДХШ лойиҳасини амалга ошириш доирасида (кейинги ўринларда лойиҳа деб юритилади) лойиҳа бўйича тендер жараёнини якунлади. Тендерда 10 та компания иштирок этди, улардан саккизтаси олдиндан малакадан ўтказилди ва йирик глобал компаниялардан техник ва молиявий таклифлар олинди: Meridiam Consortium (Франция) ва Ronesans (Туркия), Plenar Consortium (БАА), YDA Group(Туркия) ҳамда Falganim Holding (Кувайт) ва KOC Consortium (Ўзбекистон) ва Vision Investment (Саудия Арабистони).
Ғолиб сифатида Vision International Investment Company (Саудия Арабистони) — КОC Construction Mekanik Elektrik MCHJ FE (Ўзбекистон) — Rekeep (Италия) компаниялари консорсиуми эълон қилинди. Тендер ғолиби барча техник талабларга жавоб берадиган ва энг паст молиявий таклифни тақдим этган.
Компания Ўзбекистонда лойиҳа компаниясини рўйхатдан ўтказиш ва Соғлиқни сақлаш вазирлиги билан тендер натижалари эълон қилинган ҳамда вазирликнинг расмий веб сайтида эълон қилинган кундан бошлаб 30 кун ичида шартнома имзолашга таклиф қилинади.
Шартнома шартларига мувофиқ, тендер ғолиби Фарғона вилоятида уч йил ичида ишга тушириладиган 800 ўринли замонавий кўп тармоқли шифохонани халқаро стандартларга мувофиқ лойиҳалаштириши, қуриши, молиялаштириши, зарур асбоб-ускуналар билан жиҳозлаши ва техник жиҳатдан жиҳозлаши шарт. Шунингдек, 20 йил давомида техник эксплуатациясини таъминлаш мажбуриятини олади.
“Фарғона вилоятида кўп тармоқли шифохона қуриш бўйича ДХШ лойиҳасини амалга ошириш минтақа ҳамда унга туташ вилоятлар аҳолиси учун кардиожарроҳлик, нейрохирургия ва орган трансплантациясини ўз ичига олган замонавий юқори технологияли учинчи даражали тиббий хизматлардан фойдаланиш имкониятини таъминлайди”, дейилади ССВ хабарида.
Иқтисодиёт ва молия вазирлиги хабарида қайд этилишича, лойиҳа доирасида вилоятдаги мавжуд 5 та тиббиёт муассасасини бир жойда бирлаштириш ҳамда уларни илғор диагностика ва даволаш инфратузилмаси билан жиҳозлаш, ресурслардан фойдаланиш самарадорлигини оширади, хизматлар сифатини яхшилайди ва беморларнинг минтақа ёки мамлакат ташқарисига чиқиш заруратини камайтиради.
Мазкур лойиҳа давлат ва хусусий секторнинг соғлиқни сақлаш соҳасидаги муваффақиятли ҳамкорлигининг пилот лойиҳаси бўлиб, Ўзбекистоннинг бошқа ҳудудларида замонавий тиббиёт мажмуаларини ривожлантириш учун модел яратади.
Президентнинг 2024 йил 30 октябрдаги “2024—2030 йилларда Ўзбекистон Республикасида давлат-хусусий шерикликни ривожлантириш чора-тадбирлари тўғрисида”ги қарорида илғор технологияларга асосланган тиббий хизматлардан фойдаланиш имкониятларини кенгайтириш мақсадида 100 мингдан ортиқ беморларга хизмат кўрсатувчи кўп тармоқли шифохоналарни қуриш ва уларни хусусий операторлар бошқарувига бериш белгиланганди.
