Вазирлар Маҳкамасининг 3 июндаги қарори билан Қуролли кучлар давлат музейи негизида Ўзбекистон ҳарбий санъати тарихи давлат музейи ташкил этилади.
Ҳужжатда қайд этилишича, Ўзбекистон халқининг 3 минг йилдан ортиқ давлатчилик тарихининг ажралмас қисми бўлган ҳарбий тарих, саркардаларнинг ҳарбий маҳорати, миллий Қуролли кучларнинг барпо этилиши ва ривожланиш босқичлари, шунингдек, Ўзбекистонда ҳарбий соҳада амалга оширилаётган ўзгаришларни халқ, айниқса, ёшлар ва дунё жамоатчилигига танитиш ва тарғиб этиш мақсад қилинган.
Мудофаа вазирлиги Маданият вазирлиги, Маданий мерос агентлиги, Фанлар академияси Тарих институти ва Ўзбекистон Бадиий академияси билан биргаликда музей экспозицияларини юксак ғоявий-бадиий савияда яратиш учун энг истеъдодли ва маҳоратли ижодкорлар ҳамда мутахассисларни жалб этади.
Музейнинг умумий кўриниши ва меъморий тузилиши миллий услуб ҳамда анъаналарга мос бўлиши, экспозициялар жаҳондаги илғор тажрибаларни ўзида мужассам этиши таъминланади. Музей экспозициялари ва композициялари таъсирчан, интерактив усуллар, инновацион технологиялар ва сунъий интеллект имкониятларидан кенг фойдаланган ҳолда яратилади.
