Тошкент шаҳрида аёлни ҳимоя қилишга уринган эркакка оғир тан жароҳати етказган шахс 8 йил 1 ой муддатга озодликдан маҳрум қилинди. Бу ҳақда Жиноят ишлари бўйича Мирзо Улуғбек туман суди ахборот хизмати хабар берди.
Маълум қилинишиича, воқеа жорий йил март ойида, соат 02:30 атрофида пойтахтдаги ресторанлардан бирида содир бўлган. Можаро чоғида аёлни ҳимоя қилмоқчи бўлган эркак оғир жароҳат олиб, ҳушини йўқотган. Шифокорлар унга 5 соат давом этган жарроҳлик амалиётини ўтказиб, кейинчалик сунъий комага туширишган.
Суд терговлари давомида 1995 йилда туғилган А.Ш.нинг қасддан оғир тан жароҳати етказиш, фирибгарлик ва безорилик жиноятларини содир этгани аниқланган.
Суд ҳукмига кўра, А.Ш. Ўзбекистон Республикаси Жиноят кодексининг 104-моддаси 2-қисми “е” банди, 168-моддаси 4-қисми “а” банди ва 277-моддаси 3-қисми “г” бандларида назарда тутилган жиноятларни содир этганликда айбли деб топилди.
У Жиноят кодексининг 59-моддасига асосан бир нечта жиноят содир этганлик учун 8 йил 1 ой муддатга озодликдан маҳрум этилди. Ҳукмга кўра, у жазони умумий тартибли колонияда ўтайди.
Суд ҳукми устидан тарафлар белгиланган тартибда аппеляция ёки кассация шикояти киритиш ҳуқуқига эга.
