Россия президенти Владимир Путин АҚШнинг Украинага Tomahawk қанотли ракеталарини етказиб бериш ҳақидаги хабарларни “кескинликни кучайтириш уринишидир”, деб баҳолади. У мазкур техника билан мамлакатга зарба берилган тақдирда кескин жавоб қайтарилишини таъкидлади.
“Бу — кескинликни оширишга қаратилган ҳаракат. Агар Россия ҳудудига бундай қуроллар билан зарба берилса, жавобимиз жуда кескин, ҳатто ақл бовар қилмас бўлади. Буни ўйлаб кўришсин”, деган Путин 23 октябрь куни.
Tomahawk (БГМ-109 Tomahawk) — АҚШнинг сувости, сувусти ва қуруқликдаги ўрта масофага мўлжалланган юқори аниқликдаги қанотли ракетаси. У қўмондонлик пунктлари, радарлар, ҳаво ҳужумидан мудофаа батареялари, аэродромлар ва бошқа нишонларни йўқ қилиш учун мўлжалланган. Ракета 885 километр/соат тезликка эриша олади, унинг зарба радиуси 1250-2500 километр.
Путин, шунингдек, АҚШ президенти билан икки томонлама учрашув бекор қилингани ҳақидаги саволларга жавобан, “Трамп учрашувни бекор қилмаган, балки кейинга қолдиришни назарда тутган бўлиши мумкин”, дея изоҳ берган.
“Бундай учрашувлар пухта тайёргарликни талаб қилади. Тайёрланмасдан туриб учрашувга бориш — ҳам биз, ҳам АҚШ президенти учун хато бўлади. Кутилган натижасиз якунланишини истамаймиз”, деган Россия раҳбари.
Путин Россия доимо мулоқотни давом эттириш тарафдори эканини таъкидлаган. Унинг фикрича, Агар босим ўрнига жиддий, узоқ муддатли мулоқот йўлга қўйилса, Москва ва Вашингтон ўртасида ҳамкорлик учун кўплаб йўналишлар мавжуд.
У АҚШнинг янги жорий этилгансанксияларини “дўстона бўлмаган қадам” деб атаб, бу ҳаракатлар Москва-Киев муносабатларини мустаҳкамлашга хизмат қилмаслигини билдирган.
