Эроннинг энг йирик конларидан бирида қарийб 61 млн тонналик олтин захираси топилгани эълон қилинди. Маҳаллий ОАВнинг 1 декабрь куни хабар беришича, бу кашфиёт мамлакатнинг санкциялар остидаги иқтисодиётига дастак бўлиши кутилмоқда. Бу ҳақда Al Arabiya хабар берди.
Маълум қилинишича, янги захира Хуросон провинциясидаги хусусий Шадан олтин конида қайд этилган. Бу кон мамлакатнинг энг муҳим конлари қаторига кириши прогноз қилинмоқда. Топилма Саноат, конлар ва савдо вазирлиги томонидан расман тасдиқланган. Таъкидланишича, конда
- 7,95 миллион тонна оксидланган олтин;
- 53,1 миллион тонна сулфид олтин рудаси мавжуд.
Оксидланган руда одатда қазиб олиш учун анча осон ва арзон ҳисобланади.
Эрон ўзининг миллий олтин захираларининг расмий миқдорини ошкор этмаса-да, сўнгги йилларда харидларини сезиларли даражада оширганини даъво қилмоқда. ISNA ахборот агентлигининг хабарига кўра, Эрон Марказий банки раҳбари Моҳаммадреза Фарзин сентябрь ойида, банк 2023-2024-йилларда дунёдаги энг кўп олтин сотиб олган бешта марказий банкдан бири бўлганини таъкидлаган.
Марказий банк расмийси Екта Ашрафининг маҳаллий ОАВга билдиришича, олтин захираларини кўпайтириш халқаро санкциялар босими остида мамлакат иқтисодиётини мустаҳкамлашга ёрдам беради. Маълумот ўрнида, Эронда 15 та олтин кон мавкуд бўлиб, уларнинг энг каттаси мамлакат шимоли-ғарбида жойлашган Заршоуран конидир.
