Исроил армияси ўтган ҳафта Ғазо жанубидаги Рафаҳ шаҳрида туннелларда қамалда қолиб кетган фаластинлик жангари гуруҳ ҲАМАСнинг 40 нафар аъзоси ўлдирилганини маълум қилди. Бу ҳақда Al Arabiya хабар берди.
Яҳудий давлати бу ҳаракатларни Рафаҳнинг шарқий қисмидаги қолган туннелларни йўқ қилиш ва унинг ичидаги қуролли жангариларни бартараф этишга қаратилганини таъкидламоқда.
“Ўтган ҳафта Рафаҳ туннелларининг ичида 40 дан ортиқ жангари йўқ қилинди. Бундан ташқари, ҳудудда ўнлаб туннел шахталари ва террористик инфратузилма объектлари, ҳам ерости, ҳам ер устида, демонтаж қилинди”, дейилади 30 ноябрь куни эълон қилинган расмий баёнотда.
Ҳозирча ҲАМАС бу даъво юзасидан изоҳ бермаяпти. Исроил ОАВнинг хабар беришича, Рафаҳдаги ерости тунелларида тахминан 200 нафарга яқин ҲАМАС жангариси қамалиб қолган. Тель-Авив эса ҲАМАС ва воситачиларнинг қамалдагиларни хавфсиз ҳудудларга ўтказиш бўйича талабларига жавоб бермаяпти.
Тинчлик сулҳи
Рафаҳ шаҳри Ғазо секторидаги “сариқ зона” ичида жойлашган. Миср, Қатар ва Туркия воситачилигида ва АҚШ томонидан қўллаб-қувватланган ўт очишни тўхтатиш битими 10 октябрь куни Исроил ва ҲАМАС ўртасида кучга кирган.
Сулҳ битимининг биринчи босқичи икки томон ўртасида асирга олинганларнинг алмаштирилишини кўзда тутади. Режада шунингдек, Ғазони қайта қуриш ва ҲАМАСсиз янги бошқарув механизмини яратиш ҳам мақсад қилинган. Ушбу мақсад доирасида Миср Ғазода тартибни сақлаш учун полициячилар тайёрлашни бошлаган.
Сўнгги маълумотларга кўра, Исроилнинг 2023 йил октябрь ойидан бери Ғазога уюштириб келаётган ҳужумлари оқибатида ҳалок бўлганлар сони 70 мингдан ошган, уларнинг қарийб ярми аёллар ва болалардир. Яна 171 мингга яқин киши жароҳатлангани айтилади.
