Россиянинг Ростов-на-Дону шаҳридаги Жанубий округ ҳарбий суди Ўзбекистон фуқаросини Ставрополь ҳукумат биносида теракт тайёрлашда айбдор деб топиб, уни 20 йил муддатга озодликдан маҳрум қилди. Бу ҳақда Жанубий округ ҳарбий суди Telegram-каналида хабар берилди.
Маълум қилинишича, 2023 йилнинг январь ойида айбланувчи ИШИД манфаатлари йўлида ҳаракат қилишга тайёр эканини билдириб, видео мурожаат ёзган.
У ИШИД раҳбари кўрсатмасига биноан Россия ҳудудида аҳоли пунктини танлаш, теракт уюштириш учун мўлжалланган объектни ўрганиш, шунингдек, қўлбола портловчи қурилмаларни тайёрлаш ва сақлаш учун ижарага жой олиш мажбуриятини олган.
2023 йилнинг 23 сентябрь куни у Ўзбекистондан Россияга келиб, Ставрополь шаҳрини танлаганини маълум қилган ҳамда бир нечта объектларни фото ва видео тасвирга олиб, тўпланган маълумотларни ИШИД вакилларига юборган.
Кейинчалик унга теракт содир этилиши режалаштирилган жой сифатида Ставрополь ўлкаси ҳукумати биноси кўрсатилган.
Шу йилнинг декабрь ойида у портловчи қурилма тайёрлаш учун зарур бўлган қисмларни сотиб олиб, уларни яширин жойга беркитган. 18 декабрь куни эса махсус хизмат ходимлари томонидан қўлга олинган.
Суд жиноятнинг оғирлигини инобатга олиб, унга энг қатъий жазони тайинлаган. У дастлабки 5 йилни турмада, қолган қисмини эса қаттиқ тартибли колонияда ўтайди. Шунингдек, унга 1 миллион рубль миқдорида жарима тайинланган.
