Россияда 12 та машина билан тўқнашиб, уч кишининг ўлимига сабаб бўлган ўзбекистонлик ҳайдовчи 9 йилга колонияга ҳукм қилинди. Бу ҳақда Уфа шаҳрининг туман суди ҳукмига таяниб, Коммерсант хабар берди.
28 ёшли Ўзбекистон фуқароси ҳайдовчилик гувоҳномасига эга бўлмаган. У эҳтиётсизлик оқибатида икки ёки ундан ортиқ кишининг ўлимига сабаб бўлганлик (РФ ЖК 264-моддаси 6-қисми “в” банди) да айбдор деб топилган. Ҳодиса 2025 йил октябрь ойида юз берган. Ўзбекистонлик эркак Shacman русумли юк самосвалини тегишли ҳайдовчилик гувоҳномасига эга бўлмасдан бошқарган.
Машинанинг тормоз тизими носоз бўлган, бироқ ҳайдовчи уни текширмаган. У ташилаётган юк оғирлигини белгиланган меъёрдан оширган, транспорт воситасининг ҳолатини, йўл шароитини ҳисобга олмаган ва тезликни ошириб ҳайдаган.
Оқибатда юк машинаси бошқарувини йўқотиб, Уфа шоссеси ва Чудская кўчаларининг тартибга солинадиган чорраҳасига яқинлашганда 12 та автомобил билан тўқнашиб кетган. Оммавий авария оқибатида уч киши ҳалок бўлган, бир йўловчи оғир тан жароҳати олган.
Суд ўзбекистонлик эркакка жазони ўтаб бўлганидан кейин автомобил бошқаришни уч йилга тақиқлади.
