Америкалик йўловчи самолётда жанжал кўтариб, йўловчилар ва экипаж аъзоларини ҳақорат қилганидан сўнг ўриндиғига ёпишқоқ лента билан боғлаб қўйилди. Бу ҳақда “The Guardian” хабар берди.
Маълум қилинишича, жорий йилнинг 3 сентябрь куни 67 ёшли Лейн Лундин American Airlines авиакомпаниясининг 618-рейсида тартибсизлик чиқарган. Шундан сўнг, у самолётнинг биринчи класс ўриндиғига ёпишқоқ лента ва пластик боғичлар ёрдамида маҳкамланган.
Далласдан Нью-Жерсидаги Ньюарк шаҳрига учаётган самолёт воқеа сабаб Балтимор/Вашингтон Тургуд Маршалл халқаро аэропортига фавқулодда қўнишга йўналтирилган. Самолёт қўнгач, Лундин ҳибсга олинган. Унга иккинчи даражали ҳужум ва тартибсизлик айбловлари қўйилган. Эртаси куни судда айбловлар ўқиб эшиттирилгач, Лундин ҳайратланиб:
“Мен полиция ходимига ҳужум қилдимми? Унда шундай ёзилганми? Менинг кўзойнагим йўқ. Вой Худойим, қандай тартибсизлик… Мен ҳеч нарсани эслай олмайман”, деган у.
Ҳодисадан сўнг Лундинни жиловлашга ёрдам берган собиқ ҳуқуқ-тартибот ходими Хуан Мехианинг айтишича, йўловчи American Airlines ходимлари ва бошқа йўловчиларга нисбатан ирқий, қўпол ва аёлларга нисбатан ҳақоратли сўзлар ишлатган.
Яна бир йўловчи Ричард Оленик Лундин ёнидаги йўловчини ҳамда вазиятга аралашишга уринган аёлни уришга ҳаракат қилганини билдирган. Лундинни ушлаб туришга ёрдам берган Оленикнинг сўзларига кўра, ёпишқоқ лента унинг ҳаракатларини чеклаган, бироқ у қаршилик кўрсатишда давом этган.
