Ҳантавирус аниқланган круиз кемасининг америкалик йўловчисида вирус билан касалланиш ҳолати кузатилди. Кемадан жами 18 нафар АҚШ фуқароси эвакуация қилиниб, ватанига олиб келинди. Бу ҳақда BBC хабар берди.
Расмийларга кўра, АҚШга қайтган йўловчилардан бирида Андес вируси — ҳантавируснинг кам учрайдиган тури аниқланган, яна бир фуқарода эса касалликнинг енгил аломатлари кузатилмоқда. 10 май куни Испаниянинг Канар оролларида тўхтаган круиз кемасининг 90 дан ортиқ йўловчиси ватанига қайтарилмоқда. Мазкур касаллик сабабли кемада аввалроқ уч киши вафот этганди.
Бу АҚШ фуқаросида ҳантавирус аниқланиши билан боғлиқ биринчи тасдиқланган ҳолатдир. Ҳозирда икки киши Атлантада, 16 киши эса Небраскадаги мамлакатнинг ягона миллий карантин бўлимида назорат остида қолмоқда.
“Жамоат саломатлиги учун хавф туғдирадиган бирорта шахс Омаха кўчаларига эркин чиқиб кетаётгани йўқ”, деди Небраска губернатори Жим Пиллен матбуот анжуманида.
Небраскадаги муассасада жойни тежаш мақсадида айрим йўловчилар, жумладан, енгил симптомлари бўлган шахс Атлантага юборилган. Жоржияга олиб кетилган икки киши касаллик белгилари кузатилаётган бемор ва унинг ҳамроҳидир.
“Ҳантавируснинг аҳоли учун хавфи жуда пастлигича қолмоқда. Ушбу вируснинг Андес штамми осонликча тарқалмайди ва у аллақачон касаллик аломатлари намоён бўлган одам билан узоқ вақт давомида яқин алоқада бўлишни талаб қилади”, деди АҚШ Соғлиқни сақлаш ва ижтимоий хизматлар департаменти адмирали Брайан Кристин.
Мутахассисларнинг таъкидлашича, кемирувчилар орқали юқувчи ҳантавирусларнинг аксарият штаммлари одамдан одамга ўтмайди. Бироқ круиз кемасидаги йўловчиларда аниқланган Андес штамми юқимлидир.
Миллий карантин бўлими тиббий директори Майкл Вадманнинг сўзларига кўра, Небраскага олиб келинган 16 нафар йўловчининг аҳволи ва кайфияти яхши. У Андес вируси аниқланган шахс махсус биоқўриқлаш муассасасига жойлаштирилгани ва унда ҳозирча ҳеч қандай симптомлар кузатилмаётганини қўшимча қилди.
Ҳантавирус — одамга кемирувчилардан, асосан, уларнинг вирусланган ажралмалари орқали юқадиган вируслар гуруҳи. Улар ўпка ёки буйрак шикастланиши каби оғир касалликларни келтириб чиқариши мумкин. Касаллик иситма, бош ва мушак оғриқлари, кўнгил айниши ҳамда чарчоқ каби белгилар билан кечади. Ҳантавирус юққанига шубҳа туғилса, дастлабки симптомлардан 72 соат ўтгач, такрорий таҳлил топшириш тавсия этилади. Вирусга қарши махсус даво йўқ, беморларга қўллаб-қувватловчи терапия қўлланади. Аввалроқ Исроил, Испания ва Атлантикадаги олис оролда ҳам ҳантавирус қайд этилганди. Францияда эса круиз кемасидан қайтган йўловчида вирус аломатлари кузатилганди.
