Хорижлик фуқаролар Янгийўл шаҳрида қуролдан фойдалангани ҳақида видеолар тарқалганди. Тошкент вилояти ИИББ улардан ов қуроли ва ўқ-дорилари вақтинча олиб қўйилганини маълум қилди.
Видеони Кевин Ке никли фойдаланувчи Хитойдаги WeChat ижтимоий тармоғига жойлаган. Постда видео “Янгийўл шаҳрида олингани” ҳақида белги қўйилган. Видеода ушбу шахс очиқ ҳудудда туриб, нишон сифатида қўйилган елим идишларга ўқ узаётгани акс этган. Унинг ҳаракатларини видеога олиб турган шахс ҳам хитой тилида гапирган.
Тошкент вилояти ИИББ матбуот хизмати берган ахборотга кўра, 2026 йилнинг 20 январида фуқаро Я.Ю. ўзига тегишли бўлган ва ўрнатилган тартибдаги рухсатномаси мавжуд бўлган ов қуролини Тошкент вилояти ҳудудида таниши Қ.X.га фойдаланиш учун қонунга хилоф равишда берган. Қуролни қўллаш жараёнида бирор инсон ёки ҳайвонларга зарар етмаган.
Ҳозирда мазкур ҳолат юзасидан Маъмурий жавобгарлик тўғрисидаги кодекснинг 220-моддаси (қуролнинг ва унинг ўқ-дориларининг муомалада бўлиши қоидаларини бузиш) билан ҳужжатлар расмийлаштирилиб, ов қуроли ва ўқ-дорилари белгиланган тартибда вақтинча олиб қўйилди. Текширув якуни бўйича қонуний қарор қабул қилиниши таъминланиб, қўшимча ахборот берилади.
Маъмурий жавобгарлик тўғрисидаги кодекснинг 220-моддасига кўра, тегишли рухсатномага эга бўлган жисмоний шахсларнинг фуқаровий, мукофот тарзида берилган, коллекциялаш, кўргазмага қўйиш учун мўлжалланган қуролни ва унинг ўқ-дориларини реализация қилиш, олиш, сақлаш, олиб юриш, ташиш, коллекциялаш, кўргазмага қўйиш қоидаларини бузиш БҲМнинг 5 бараваридан 7 бараваригача миқдорда жарима солишга ёки ҳақини тўлаб шу қуролни ва ўқ-дориларни олиб қўйишга сабаб бўлади.
