Бугун, 10 декабрь куни март ойида етказиб бериладиган кумуш фьючерслари Comex биржасида 1,94 фоизга қимматлаб, унция учун 62,02 долларга кўтарилди. Бу ҳақда “Bloomberg” хабар берди.
Нашрнинг ёзишича, кеча, 9 декабрь куни савдоларда нарх биринчи марта унция учун 60 доллардан юқорига кўтарилган. Кумушга бўлган талабнинг ўсиши бозордаги таклиф танқислиги ва АҚШ Федерал резерв тизимининг пул-кредит сиёсатини янада юмшатиши ҳақидаги кутишлар билан изоҳланмоқда. Қимматбаҳо металлар одатда паст фоиз ставкалари шароитида ўсишга мойил бўлади.
Йил бошидан бери кумуш нархи 100 фоиздан кўпроққа ошган, олтин эса 60 фоизга қимматлаган. Kept компанияси таҳлилчиларининг айтишича, кумушга талаб АҚШнинг навбатдаги божхона божлари ва геосиёсий омиллар туфайли глобал бозорларда кучайган ноаниқлик фонида ошган. АҚШ Федерал резерви фоиз ставкасини пасайтириши кутилаётганлиги ва металлар учун сармоявий қизиқишнинг сақланиб қолиши ҳам кумуш нархини қўллаб-қувватлаган.
Kept таҳлилчиларининг баҳолашича, гарчи кумуш қўшимча маҳсулот сифатида олинадиган йирик полиметалл ва қалай-рух конларида қазиб олишнинг ошиши кутилаётган бўлса-да, кумуш бозори 2025 йилда ҳам кетма-кет бешинчи йил камомадда қолади.
“Freedom Finance Global” таҳлилчилари кумушнинг ўсиш омиллари ҳануз долзарблигича қолаётганини қайд этмоқда: глобал кумуш бозори танқислиги кучайиб бормоқда ва экспертлар баҳосига кўра, бу дунё миқёсидаги таклифнинг тахминан 16 фоизини ташкил этади. Бу саноатдаги барқарор талаб ўсиши ҳамда қимматбаҳо метални қазиб чиқаришни ошириш имкониятларининг чекланганлиги билан боғлиқ.
BNP Paribas банки эксперти Дэвид Уилсоннинг айтишича, кумуш нархининг сўнгги уч ҳафта ичида тахминан 20 фоизга кўтарилганини инобатга олганда, коррекцияни кутиш мантиқан тўғри бўларди. Аммо бозордаги жуда кучли ижобий кайфият фонида ҳатто айрим иштирокчилар нархнинг унция учун 100 долларгача ўсишини айтаётгани кумуш бозоридаги ўсиш импульсининг сақланиб қолиши эҳтимоли юқори эканини қўшимча қилган.
