“Барселона” 2026 йилги Испания Суперкубоги ярим финалида “Атлетик Бильбао”ни 5:0 ҳисобида тор-мор қилди ва бу натижа турнир тарихидаги энг йирик ғалаба сифатида қайд этилди. Голларнинг тўрттаси биринчи бўлимда киритилди. Бундай ҳолат Суперкубок тарихида аввал кузатилмаган.
Учрашувда Ферран Торрес, Фермин Лопес, Руни Бардагжи ва Рафинья (дубль) гол муаллифларига айланди.
Каталония клуби ушбу баҳсда ўз дарвозасидан гол ўтказиб юбормади. Шу тариқа жамоа 2020-йилдан буён илк бор кетма-кет бешта “қуруқ” ўйин ўтказди.
Учрашувнинг 52-дақиқасида Рафинья ҳисобни 5:0 кўринишига келтирди. Бу “Барселона” учун Испания Суперкубогидаги юбилей 100-гол бўлди. Шунингдек, ушбу мусобақа тарихидаги энг сермаҳсул футболчи — Лео Месси бўлиб, у 14 та голга муаллифлик қилган.
Ярим финалнинг иккинчи жуфтлиги 9 январга ўтар кечаси Тошкент вақти билан соат 00:00 да старт олади. Унда “Атлетико Мадрид” ва “Реал Мадрид” жамоалари ўзаро баҳс олиб боради. Мусобақанинг финал учрашуви эса 12 январга ўтар кечаси Саудия Арабистонининг Жидда шаҳридаги “Қирол Абдулла” стадионида бўлиб ўтади.
Испания Суперкубогининг амалдаги соҳиби ҳам “Барселона” ҳисобланади. 2025 йилги турнир финалида каталонияликлар “Реал”ни 5:2 ҳисобида мағлуб этиб, ушбу совринни қўлга киритган эди.
Аввалроқ, “Барселона” ҳамда Бразилия терма жамоаси вингери Рафинья Диас фаолиятини Саудия Арабистони чемпионатида давом эттириши мумкинлиги ҳақида хабарлар берилган эди.
Маълумотларга кўра, риёдликлар футболчи учун “Барселона”га 100 миллион евро таклиф қилган. Ушбу сумманинг 80 миллион евроси кафолатланган тўлов, яна 20 миллиони эса бонуслар кўринишида белгиланган. Клуб раҳбарияти мазкур трансфер орқали Неймар кетганидан сўнг юзага келган бўшлиқни тўлдириш ҳамда Симоне Инзаги бошқарувидаги жамоани Осиё қитъасида мутлақ етакчига айлантиришни мақсад қилган.
