Олтин нархи бир троя унцияси учун 5,5 минг доллардан ошиб, тарихий рекордни янгилади. Бу ҳақда Bloomberg хабар берди.
АҚШ долларининг қадрсизланиши, шунингдек инвесторларнинг облигациялар ва валюталарни хавфли активлар деб баҳолаб, олтинни афзал кўраётгани фонида қимматбаҳо металл нархи кетма-кет тўққиз кундирки рекордлар қайд этмоқда. Бир кун ичида олтин нархи 3,2 фоизгача ошди. Cомех биржасида бир троя унцияси 5 584,3 доллардан баҳоланди. Таққослаш учун, бир кун аввал, 28 январь куни, олтин қиймати 5200 дан ошиб рекорд қайд этганди. 12 январь куни эса олтиннинг бир унцияси 4 600 доллар бўлган.
2026 йил бошидан буён спот олтин қарийб 28 фоизга, кумуш эса деярли 65 фоизга қимматлашди. Глобал беқарорлик, савдо урушлари хавфи ва геосиёсий ноаниқликлар шароитида инвесторлар хавфсиз активларига мурожаат қилмоқда, бу эса олтинга бўлган талабни янада оширмоқда.
Қимматбаҳо металларга талаб ортишига яна бир қатор омиллар ҳам таъсир кўрсатмоқда. Хусусан, инфляциянинг юқори даражада сақланиб қолаётгани, АҚШ долларининг заифлашуви, марказий банклар томонидан олтин харидларининг кўпайиши, шунингдек АҚШ Федерал захира тизими (Fed) фоиз ставкаларини пасайтириши кутилаётгани нархларнинг ўсишига туртки бермоқда.
Таҳлилчиларга кўра, АҚШ марказий банки асосий фоиз ставкасини 3,50–3,75 фоиз оралиғида ўзгаришсиз қолдириши мумкин. Шу билан бирга, Fed расмийларининг баёнотлари яқин кунларда олтин нархига сезиларли таъсир кўрсатиши эҳтимоли мавжуд.
