Жаҳон марказий банклари 2026 йил бошидан бери 130 тонна атрофида олтин харид қилди. Ўзбекистоннинг харидлари 40 тоннани ташкил этди. Бу ҳақда Жаҳон олтин кенгаши ҳисоботида маълум қилинди.
Польша Марказий банки олтин харидлари бўйича етакчилик қилмоқда. Мамлакат июль ойида захираларини 8 тоннага, йил бошидан бери жами 90 тоннага оширди. Шу тариқа Польша жаҳон марказий банклари орасида энг йирик олтин харидорига айланди.
Кейинги ўринни Хитой эгаллади. Мамлакат июль ойида 20 тонна, йил бошидан бери 60 тонна олтин харид қилди. Ҳозирда Хитойнинг расмий олтин захираси 2 366 тоннага етган.
Ўзбекистон июль ойида 1 тонна олтин сотганига қарамай, йил бошидан бери 40 тонна харидни амалга оширди ва бу борада жаҳон марказий банклари орасида учинчи ўринни эгаллади. Чехия Миллий банки июль ойида 2 тонна, йил бошидан бери эса 12 тонна олтин харид қилди. Натижада мамлакатнинг умумий захираси 6 фоизга ошиб, 84 тоннага етди.
Қозоғистон, Малайзия ва Боливия марказий банклари июль ойида 1 тоннадан олтин харид қилди. Қозоғистон йил бошидан бери 29 тонна олтин жамғариб, дунёдаги энг йирик бешта олтин харидоридан бирига айланди. Малайзия ва Боливия эса олтин бозорига янги кириб келган мамлакатлар бўлиб, уларнинг йил бошидан бери харидлари мос равишда 6 ва 2 тоннани ташкил этди.
Россия йил бошидан бери жами 50 тонна, июль ойида эса 6 тонна олтин сотди. Натижада мамлакатнинг умумий олтин захираси 2 277 тоннага тушди. Туркия Марказий банки эса июль ойида 1 тонна олтин сотди ва йил бошидан бери сотилган олтин ҳажмини 85 тоннага етказди.
Ўзбекистонда иккита йирик корхона — Навоий ва Олмалиқ кон металлургия комбинатлари олтин қазиб олади. Марказий банк ушбу муассасалардан олтинни сотиб олувчи ягона харидор ва эксклюзив ҳуқуқ эгаси ҳисобланади.
