Ўзбекистон Мудофаа вазирлиги ҳарбий хизматчилари кичик сержант Илҳом Саломов ва III даражали сержант Турдимурод Авлаев АҚШнинг Миссисипи штатидаги Camp Shelby базасида ўтказилган “Энг илғор жангчи — 2026” халқаро мусобақасида ғолибликни қўлга киритди. Бу ҳақда вазирлик ахборот хизмати хабар берди.
16–18 март кунлари бўлиб ўтган мусобақада ўзбекистонлик ҳарбийлар АҚШ Миллий гвардияси махсус бўлинмалари вакиллари билан куч синашди. Дастур доирасида иштирокчилар 13 та мураккаб шартни, жумладан, жисмоний тайёргарлик тестлари, тунги ориентирлаш, узоқ масофаларга юк билан юриш, қурол билан ишлаш, тиббий тайёргарлик ва бошқа синовларни бажарди.
Қайд этилишича, ўзбекистонлик ҳарбийлар бир қатор йўналишларда рекорд натижаларни қайд этди. Хусусан, улар 20 килограмм юк билан 20 километр масофани 1 соат 48 дақиқада босиб ўтди. Шунингдек, Турдимурод Авлаев мураккаб тўсиқлар йўлагини 10 дақиқа 34 сонияда, Илҳом Саломов эса тунги 15 километрлик йўналишни 59 дақиқада якунлади.
Мусобақа якунида ҳарбий хизматчилар махсус соврин билан тақдирланди. Таъкидланишича, ўзбекистонлик ҳарбийлар мазкур мусобақада 2019 йилдан буён мунтазам иштирок этиб, ҳар сафар юқори натижаларни қайд этиб келмоқда.
Маълумот учун, ғолиблар 22 март куни Тошкент халқаро аэропортида тантанали равишда кутиб олинади.
