Кеча, 26 ноябрь куни АҚШнинг Вашингтон шаҳрида, Оқ уйдан унча узоқ бўлмаган ҳудудда икки нафар Миллий гвардия хизматчиси отиб кетилди. Бу ҳақда махфий хизмат вакилига таяниб, “The Washington Post” хабар берди.
Жароҳат олган ҳарбийларнинг аҳволи жуда оғир экани айтилмоқда. CNN маълумотига кўра, отишма вақтида бир нечта одам жароҳатланган, улар орасида камида бир нафар гвардиячи бор. Вашингтон полициясининг маълум қилишича, отишма 17-кўча ва 1-кўча кесишган жойда – Оқ уйга атиги бир блок масофада содир бўлган. Полиция гумонланувчини қўлга олган.
Кейинчалик Ички хавфсизлик вазири Кристи Ноэм ҳам икки нафар миллий гвардиячининг яраланганини тасдиқлаган. Оқ уйда зудлик билан локдаун (бинога кириш-чиқиш тўлиқ чекланади) жорий этилган.
Оқ уй вакилининг маълум қилишича, АҚШ Президенти Дональд Трамп тез орада мурожаат билан чиқади. У отишма содир бўлишидан бир кун аввал Флорида штатидаги Мар-а-Лаго резиденциясига етиб борган эди. У ерда 27 ноябрь куни нишонланадиган Шукроналик куни байрамини ўтказиши режалаштирилган.
Миллий гвардия қўшинлари Вашингтонда август ойининг ўрталарида жойлаштирилган. Улар жиноятчиликка қарши кураш мақсадида айнан Трампнинг топшириғи билан шаҳарга киритилган.
Билдирилишича, ҳужум қилган шахс яраланган ва қўлга олинган. Расмийларга кўра, у 2021 йилда Афғонистондан АҚШга келган.
Ушбу воқеа бўйича суриштирувни Ички хавфсизлик вазирлиги ҳамда махфий хизмат биргаликда олиб бормоқда.
Колумбия округи мэри Мюриэл Баузернинг сўзларига кўра, Миллий гвардия аскарларига ҳужум атайин қилинган. Унинг айтишича, гумонланувчи айнан шу аскарларни нишонга олган.
АҚШ Президенти Дональд Трамп воқеани “терроризм акти” деб атаган. Truth Social’даги хабарида у ҳужумчини “ёвуз ҳайвон” деб тилга олган ва у қилган жинояти учун “жуда оғир жавоб” беришини ёзган.
Гувоҳларнинг айтишича, воқеа содир бўлган ҳудудда бир неча марта ўқ овози эшитилган, одамлар ваҳимага тушиб, панага югуришган. CNN ва бошқа ОАВлар отишмадан кейинги манзараларни тасвирга олган: икки аскар ёнида ерда ётган учинчи шахсга ҳам тиббий ёрдам кўрсатилгани кўринган.
