АҚШ ва Буюк Британиянинг Ҳинд океанида жойлашган Диэго Гарсия қўшма ҳарбий базаси Эрон ҳужумига учради. The Wалл Стреет жоурнал нашрининг хабар беришича, эронликлар оролга иккита баллистик ракета учирган. Бироқ улардан бири АҚШ ҳарбий кемаси томонидан уриб туширилган, иккинчиси эса техник носозлик сабаб сувга қулаган.
Диэго Гарсияга ҳужум Қўшма Штатлар ва минтақа учун муҳим сигнал ҳисобланади. Боиси у Эрон ҳудудидан тахминан 3800 километр узоқликда жойлашган бўлиб, АҚШнинг стратегик бомбардимончилари сақланади. Шу кунга қадар эронликлар ихтиёридаги энг қудратли ракета 2000 км масофага парвоз қилиши мумкин деб ишониларди. Мазкур воқеа энди Диэго Гарсия ҳам хавфсиз эмаслигини, қолаверса Эрон Европанинг аксарият мамлакатларини нишонга олиши мумкинлигини кўрсатади.
Ҳужум Буюк Британия бош вазири Кир Стармер Қўшма Штатларга қироллик ҳарбий базаларидан Эронга қарши фойдаланиш учун рухсат берганидан кўп ўтмай амалга ошди. Баъзи кузатувчиларга кўра, Теҳрон Лондонга шу орқали жавоб қайтармоқчи бўлган. Бунгача Британия ўз базаларидан фақат мудофаа характеридаги операциялар ва иттифоқчиларни ҳимоя қилиш учун фойдаланишга рухсат берган эди. Эрон ташқи ишлар вазири Аббос Ароқчи қиролликнинг ушбу қарорини кескин танқид қилди.
“Британия халқининг катта қисми бу урушни қўллаб-қувватламайди. Стармер эса ўз халқининг фикрини инобатга олмай, британияликларни хавф остига қўймоқда. Эрон ўзини ҳимоя қилиш ҳуқуқидан фойдаланади”, деб ёзганди у ўз саҳифасида.
Стармернинг мазкур қарори Буюк Британия ичида ҳам ички сиёсий тортишувларга сабаб бўлди. Консерваторлар етакчиси Кеми Баденок буни кескин бурилиш деб атади. Либерал-демократлар ва “Яшиллар” партияси эса бош вазир рухсат беришдан олдин парламентдан ижозат олиши кераклигини таъкидлади
