АҚШ Сенати ҳукуматнинг тўхтаб қолишини (“шатдаун”) тугатиш ва унинг ишини тиклаш учун қонун лойиҳасини маъқуллади. Бу ҳақда CNN хабар берди.
Ҳужжат учун 60 сенатор овоз берган, 40 нафари қарши чиққан. Энди бу ҳужжат Вакиллар палатасига юборилади. У ерда ҳам қабул қилингач, АҚШ Президенти Дональд Трамп уни имзолаши керак бўлади. Жараён бир неча кун давом этиши мумкин.
“Politico” нашрининг ёзишича, бу ҳужжат янги бюджет режасининг асосига айланиши керак. Унда бир қатор муҳим идораларни бутун молиявий йил давомида молиялаштириш кўзда тутилган. Хусусан, Қишлоқ хўжалиги вазирлиги, Озиқ-овқат ва дори воситалари устидан назорат бошқармаси, Ветеранлар ишлари бўйича идора, ҳарбий қурилиш лойиҳалари ва Конгресс фаолияти учун маблағ ажратилади. Қолган давлат тузилмалари эса 30 январгача вақтинчалик молиялаштирилади.
АҚШдаги ҳукумат иши тўхташи 1 октябрь куни бошланган ва ҳозир 40 кундан бери давом этмоқда. Бу мамлакат тарихидаги энг узун муддатли ҳукумат тўхташи бўлди. Ҳукумат фаолиятининг тўхтаб қолишига демократлар ва республикачилар ўртасида Obamacare дастури доирасидаги субсидиялар ҳамда Medicaid дастурини молиялаштириш борасидаги келишмовчиликлар сабаб бўлган. Олдинги рекорд ҳам Трампнинг Президентлик даврида кузатилган эди – у 35 кун давом этган ва 2019 йилнинг январида якунланган.
