АҚШ Суриядаги асосий ҳарбий базаларидан биридан қўшин ва техникасини олиб чиқишни бошлади. Бу ҳақда Al Jazeera хабар берди.
Гап Ҳасака вилоятидаги Қасрак базаси ҳақида кетмоқда. 23 февраль куни у ердан оғир техника, ҳарбий хизматчилар ва зирҳли машиналар ортилган ўнлаб юк автомобильлари чиқиб кетаётгани кузатилган. Улар Ироқ чегараси томон йўл олган.
АҚШ президенти Дональд Трамп маъмурияти камида январь ойидан буён Суриядан тўлиқ чиқиб кетиш масаласини кўриб чиқмоқда. Қасрак базасидан техникаларни олиб чиқиш жараёни бир неча ҳафта давом этиши мумкин.
Қўшинларни олиб чиқишнинг биринчи босқичи ал-Шаддодий базаси ва ал-Умар нефть конидан бошланган. Аввалроқ ушбу ҳудудлардаги кучлар операцияга тайёргарлик доирасида Қасракка кўчирилган эди.
15 февраль куни Сурия армияси ал-Шаддодий базасини тўлиқ назорат остига олган. АҚШ бир неча ойдан бери Суриядаги ҳарбий иштирокини қисқартириб келмоқда: июль ойида бу ерда 1500 нафар ҳарбий бўлган бўлса, ҳозирда уларнинг сони тахминан 900 нафарга тушган. Қасракдан тўлиқ чиқиб кетилган тақдирда ҳам, Ироқ чегарасига яқин Рмелан ҳудудида АҚШ базаси сақланиб қолади.
“АҚШ қўшинлари Суриядан чиқиб кетишни бир ой ичида якунлайди”, деб маълум қилди AFP ахборот агентлигига уч манба.
“Бир ой ичида улар Суриядан чиқиб кетади ва энди базаларда ҳеч қандай ҳарбий мавжуд бўлмайди”, деди Сурия ҳукумати расмийси, курд манбаси буни тасдиқлади.
Al Jazeera мухбири Дамашқдан туриб, “Сўнгги бир ҳафта ичида бу минтақада эвакуация қилиниши бошланган учинчи АҚШ базаси”, эканини айтди.
20 февраль куни АҚШ минтақадаги энг йирик база — Қатардаги Ал-Удайд авиабазаси ҳамда Баҳрайндаги АҚШ Ҳарбий-денгиз кучларининг Бешинчи флоти билан боғлиқ объектлардан юзлаб ҳарбийларни эвакуация қилган. Бу чора АҚШ операцияни бошлаган тақдирда, Эроннинг эҳтимолий жавоб зарбаларидан ходимларни ҳимоя қилишга қаратилгани айтилмоқда.
