Жиззах вилояти Зафаробод туманида эшакни машинага боғлаб судраган ҳайдовчи жавобгарликка тортилди. Бу ҳақда “Замон” дастурида хабар берилди.
Лавҳада юк машинаси ҳайдовчиси эшакни транспорт воситасига боғлаб, йўл бўйлаб судраб кетгани акс этган. Ҳолат тасвирга олиниб, ижтимоий тармоқларга жойланган ва кенг муҳокамаларга сабаб бўлган. Ўтказилган тезкор тадбирлар натижасида ҳайдовчининг шахси аниқланган.
У Наманганнинг Поп туманидан деҳқонлар юкини олиб келаётган бўлган ва йўлда машинаси носоз ҳолатга келиб қолган. Юкхонадаги эшак димиқиб қолмаслиги учун туширилган, кейин эса транспортни таъмирлаб бўлгач, ҳайвонни қайта ортиш учун шароит бўлмагани сабабли уни 100–150 метр масофада судраб боришга мажбур бўлганини билдирган. Ҳайдовчи қилган ишидан пушаймон эканини таъкидлаган.
Мутасаддилар ҳар қандай шароитда ҳам ҳайвонларни бундай тарзда ҳаракатлантириш мумкин эмаслигини, бунинг учун жавобгарлик белгиланганини эслатди. Ҳолат юзасидан ҳайдовчига нисбатан Маъмурий жавобгарлик тўғрисидаги кодекснинг 111-моддаси (ҳайвонларга нисбатан шафқатсиз муносабат) билан маъмурий баённома расмийлаштирилиб, иш ҳужжатлари судга юборилган.
Қайд этилишича, ҳайвонот дунёсига нисбатан шафқатсиз муносабатга қонунчиликда муқаррар жазо белгиланган. Мутахассислар бундай ҳолатлар жамиятда ҳуқуқий маданият ва масъулиятни ошириш зарурлигини яна бир бор кўрсатишини таъкидлади.
