АҚШ суди Афғонистон фуқароси, “Вилояти Хуросон” террорчи гуруҳи аъзоси Муҳаммад Шарифуллоҳни 20 йилга озодликдан маҳрум қилди, деб хабар бермоқда АҚШ Адлия вазирлиги.
Шарифуллоҳ террорчилик ташкилотини молиялаштириш ва қўллаб-қувватлаш мақсадида фитна уюштиришда айбланган. Прокуратура маълумотларига кўра, у бутун дунё бўйлаб ўндан ортиқ терактларда иштирок этган.
Булар қаторида Шарифуллоҳ 2021 йилда Америка қўшинлари Афғонистондан олиб чиқилаётган пайтда Кобул аэропорти яқинида портлаш уюштиришга ёрдам берган. Бундан ташқари, у 2024 йилда Москва яқинидаги Crocus City Hall’га террористик ҳужум содир этганларга “Калашников” автоматлари ва бошқа қуроллардан қандай фойдаланиш бўйича кўрсатмалар берган ва улар билан алоқада бўлиб турган.
Теракт ҳақида
Crocus City Hall’даги теракт 2024 йил 22 март куни кечқурун содир бўлди. Бир неча қуролланган киши концерт зали биносига бостириб кириб, оломонни отиб ташлаган, кейин эса бинони ёқиб юборган. Теракт оқибатида 149 киши ҳалок бўлди, бир киши бедарак йўқолди, 609 киши тан жароҳати олди.
Ҳужум учун жавобгарликни “Вилояти Хуросон” гуруҳи зиммасига олди. Хусусан, Тожикистоннинг тўрт нафар фуқароси ҳужумни бевосита ижро этишда айбланди — улар айбига иқрор бўлган. Мазкур ҳолатдан кейин Россияда мигрантларга нисбатан рейдлар кучайганди.
Crocus теракти ижрочилари умрбодга қамалди
2026 йил 17 март куни Crocus City Hall’да терактни ижро этишда айбланган Тожикистоннинг тўрт нафар фуқароси умрбодга қамалди. Далержон Мирзоев, Саидакрами Рачабализода, Шамсиддин Фаридуни ва Муҳаммадсобир Файзов суд томонидан террорчилик фаолиятини амалга ошириш мақсадида тайёргарликдан ўтиш, қурол-яроғнинг ноқонуний муомаласи, террорчи ташкилот фаолиятида иштирок этиш ва террорчилик ҳужумини содир этишда айбдор деб топилди.
Иш бўйича яна 11 киши умрбод қамоқ жазосига, айбланувчиларга автомобил ва квартира берган Исроил, Диловар ва Аминчон Исломовлар 19 йил-у 11 ойга, ижрочиларга оқ Reno Logan сотган Алишер Қосимов эса 22 йил-у 10 ойга қамалди.
Умрбодга ҳукм қилинган Ёқубжон Давлатхон Юсуфзода ҳибсхона камерасида ўз жонига қасд қилди. Воқеа “Матросская Тишина” тергов изоляторида содир бўлган. Яна бир судланувчи Жаброил Аушев ҳам ўз жонига қасд қилишга уринган. Бироқ изолятор ходимлари буни ўз вақтида пайқаб, уни қутқариб қолган.
